Mange tripe

Question:

Eski gagne droit mange tripe ?

Réponse :

Selon ene hadice ki trouve dans Maraasil Abou Dawoud, Tabraani, Mouswannaf Abdurrazzzaq et Sounan Al-Baihaqui, Rassouloullah ‎(Sallallaahou A'laihi Wasallam)‎ fine désapprouve la consommation de 7 parties depi dans ene bouc. Pou banne 'Oulama, ça règle-là li pas restreint à ene bouc seulement. Ça li applique pou tous zanimau ki li halaal à consommé. Donc d'après ça hadice-là, c'est necque ça sept parties ki Rassouloullah ‎(Sallallaahou A'laihi Wasallam)‎ fine désapprouvé-là ki haraam. Et tripe li pas trouve dans ça sept parties ki Rassouloullah ‎(Sallallaahou A'laihi Wasallam)‎ fine désapprouvé. Donc li halaal. Si nou inclure tripe là-dans, li pou vine huit. Li pas pou reste sept ki Nabi ‎(Sallallaahou A'laihi Wasallam)‎ fine mentionné. Dans ça cas-là li pou ene l'ajoute lors ceki Nabi ‎(Sallallaahou A'laihi Wasallam)‎ fine précisé et ça li bien pas bon.

Donc tripe li halaal acoze ki Nabi ‎(Sallallaahou A'laihi Wasallam)‎ pas fine mentionne li dans ça sept kitchose ki li fine désapprouvé. Astere ene dimoune gagne droit pas mange li si li délicat mais li pas gagne droit qualifié li de makrouh ou bien haraam parceki dire ki ene kitchose li halal ou bien li haraam c’est ene jugement ou ene verdict dans Deen. Et ça li bizin basé lors banne preuve de shariat. Ene dimoune pas gagne droit dire ça de so coté. Personne pena droit déclare ene kitchose halal ou bien haraam apart Allah Ta’ala. Li bon conné ki d’après principe surtout en ceki concerne nourriture, ziska preuve du contraire, tout kitchose li halal. Donc faute de preuve, tripe pou continué reste halaal.

[Extrait de Al Jamiat Vol.4 No.15]