Istighfaar

Tout dimoune bizin dimane pardon avec Allah Ta’ala pou banne manquements ki li ena. Dimane pardon avec Allah Ta’ala même ki appelle istighfaar.

Allah Ta’ala apprécié banne ki dimane li pardon. Nabi ‎(Sallallaahou A'laihi Wasallam)‎ ti pé dimane pardon 70 à 100 fois par jour. Et pourtant Allah Ta’ala ti fini proclame so grâce en faveur Nabi ‎(Sallallaahou A'laihi Wasallam)‎. Nabi ‎(Sallallaahou A'laihi Wasallam)‎ so la vie en entier ti dans ibaadat Allah Ta’ala. Là aussi li fine senti le besoin pou cherche pardon avec Allah Ta’ala. Ki quantité nécessaire ça li bizin été pou nou ki nou la vie li rempli avec banne manquements. Nou bizin comprend ki pli ene dimoune li faire ibaadat Allah Ta’ala, pli li trouve so manquements et pli li cherche pardon Allah Ta’ala. Acoze ça même banne Sahaba-e-Kiraam ti pé dimane Allah Ta’ala pardon. Et cela même après avoir passe ene nuit entier dans ibaadat.

D’après ene hadice quand ene dimoune li prend l’habitude dimane Allah Ta’ala pardon, Allah Ta’ala accorde li trois cadeau :

1. Li tire li depi dans tout difficulté,
2. Li soulage li de tout tracasserie et
3. Li accorde li so besoin dans ene façon ki li pas attane.

D’après ene hadice ki trouve dans Sounan Abou Dawood et Tirmizi, Nabi ‎(Sallallaahou A'laihi Wasallam)‎ fine recommane la formule suivante pou cherche pardon :

"استغفر الله الذى لا اله الا هو الحى القيوم واتوب اليه"

Li bon si nou lire ça 100 fois gramatin et 100 fois tantôt. Ça pou ene moyen à la fois pou nettoye nou de nou banne péchés, ranne nou appréciable dans lizié Allah Ta’ala et ouvert nou chemin vers le succès.

[Extrait de Al Jamiat Vol.4 No.15]