Riche d’après shariat

Ena trois catégories de riche d’après shariat. D’abord nou ena ene personne ki li ena tout so banne besoins pou ene jour. Alors ça aussi li considéré couma ene dimoune riche dans le sens ki li pas gagne droit dimane pou demain. Mais si kikene donne li sans dimandé ou bien sans li garde l’espoir et sans li attane kikene donne li, alors li gagne droit prend.

Ena ene deuxième catégorie dimoune ki ena plis ki so banne besoins et ça en plis-là li dans la valeur 200 dirham ou plis même mais li pas en forme la monnaie liquide ni en forme marchandise ni en forme bijoux en argent ou en or. Ni li ena kit objet en argent ou en or ki arrive ça valeur-là. Ene dimoune pareil li riche mais ça qualité richesse-là pas faire zakaat vine waajib lors li. Bien sur li pas gagne droit prend zakaat même si kikene donne li sans dimandé aussi. Et apart ça li bizin conné ki li bizin faire Qourbaani et li bizin tire fitra pou li même et de la part so banne zenfants mineurs. Par exemple ene dimoune ena meuble plis ki bizin dans so la caze ou bien li ena banne vessel ki li pas servi même. Ou bien li ena so la caze ki bien grand ki dépasse so nécessité. Ça banne kitchose en plis-là zotte atteine la valeur de 200 dirham ou plis. Dans ça cas-là ça dimoune-là pena zakaat pou donné pou ça banne kitchose en plis-là mais li pena droit accepté zakaat si kikene donne li. Et li bizin faire Qourbaani couma li bizin tire so propre fitra et fitra de la part so banne zenfants mineurs.

Nou ena ene troisième catégorie. C’est ene personne ki possède kitchose ki plis ki so besoin. Et ça li en forme la monnaie liquide ou bien en forme kit objet en or ou en argent ou bien en forme marchandises. Si ça banne kitchose-là zotte atteine la valeur 200 dirham ou bien plis ki ça, alors ça personne-là li bizin tire zakaat. Mais li pas obligé tire li ça jour ki li fine gagne ça quantité richesse-là. C’est necque ene banané après ki li fine gagne ça quantité richesse-là ki li bizin tire zakaat. Et quand li tire zakaat, li bizin aussi calcule zakaat pou la monnaie ou richesse ki li fine gagné au milieu l’année aussi. C'est-à-dire li bizin tire zakaat ki li ti ena dans commencement et apart ça li bizin tire zakaat pou tout ceki li fine gagné au cours de l’année ziska li complète un an.

[Extrait de Al Jamiat Vol.4 No.15]