Passeport jannat

Passeport. Et ça aussi passeport pou jannat ! Pas ene ti cadeau ça. Dimoune ki pas pé faire zisse pou li capave rente dans ene pays cote li croire ena l’avenir. Si li ti ena la barbe, li accepté pou diminué so longueur si li ene ti pé hésité pou rase li. Li change so battage. Li vide la monnaie. Ena mamzelle capave accepté marié avec ene kikene ki vraiment li pas content mais li faire li zisse pou capave rente dans ene certaine pays. Tout ça sacrifice-là zisse pou quelque temps parceki finalement ou bizin quitte tout la même ou allé. Lezot ki pou jouir ceki ou fine trimé pou ramassé. Mais si vraiment nou croire dans jannat, nou bizin faire plis ki ça pou capave gagne passeport jannat. Nou pou ena l’amitié avec ene ki capave aide nou pou gagne ça. Ena boucou kitchose ki bien valeureux aussi ki nou capave sacrifié pou gagne ça passeport-là. Et tout ceki nou pou faire, li pou encore bon marché parceki nou pé faire ça pou ene jannat cote nou pou ena nou bonheur et nou bien être pou tout le temps cote na pena aukene problème ni souci ni tracas ni la peur ni regret ni la chagrin. Là bas nou pou ena tout ceki bon ki pou ranne nou de plus en plus heureux. Tout le jour ene qualité. Donc jamais li pou monotone. Eski li pas ene bon investissement ? Qui Allah Ta’ala accepté nou pou ça zeffort-là ! Ameen.

[Extrait de Al Jamiat Vol.5 No.1]