Nom Allah Ta’ala

Allah Ta’ala li grand. C’est necque Allah Ta’ala même ki conne so Grandeur. Quant à nou, nou bizin contente nou par necque dire ki pena narien couma Allah Ta’ala. Allah Ta’ala li incomparable. Coumsa même Allah Ta’ala so nom aussi li boucou grand. C’est necque banne ki zotte chance fort ki gagne l’occasion prend ça nom beni-là. Dimoune ki gagne l’occasion prend nom Allah Ta’ala, li bizin considère li bien heureux.

Allah Ta’ala fine qualifié banne ki prend nom Allah Ta’ala de banne ki intelligents. Dans le vrai sens du mot, c’est ça banne-là même ki intelligent parceki zotte fine conne choisir ene kitchose ki non seulement li bénéfique dans ça le monde-là, mais ki pou amène boucou bonheur dans Qabar et dans Aakhirat.

Par conte banne ki fine gaspille zotte le temps précieux dans chante banne chanson ou bien dans cause banne causé inutile, zotte fine prive zotte de ça faveur inestimable-là. Li couma dire ene dimoune ki fine joué tout so capital dans casino et finalement li pas reste narien. Li souffert et li faire so madame zenfant souffert ensam avec li. Ene dimoune fou même ki capave appelle ene dimoune pareil intelligent.

Couma tout kitchose ena ene goût, coumsa même Allah Ta’ala so nom aussi ena ene saveur extraordinaire. Ene saveur incomparable. Li incomparable couma Allah Ta’ala li incomparable. Ena aussi banne personnages ki fine ena l’honneur dégusté ça saveur-là. Acoze ça zotte gagne difficulté et zotte souffert dans arrête prend ça nom-là pareil couma ena ki gagne difficulté dans prend ça nom-là.

Nabi ‎(Sallallaahou A'laihi Wasallam)‎ ti pé pense Allah Ta’ala tout le temps. Et li ti conseille ene Sahabi pou garde so la langue engagé dans prend nom Allah Ta’ala. Nou ranne nou même heureux par prend nom Allah Ta’ala. Nou bizin pas laisse le temps perdi. Nou bizin profité tanque nou lizié ouvert.

Banne dimoune ki fine prive zotte de ça faveur-là, zotte ena tout raison pou regretté jour Qiyaamat. Mais li tellement précieux ki banne ki fine donne zotte la vie dans prend ça nom-là aussi pou regretté lors banne moments ki zotte fine capave laisse allé sans prend nom Allah Ta’ala là-dans.

[Extrait de Al Jamiat Vol.5 No.1]