Mensonge

Mensonge signifié donne information contre vérité avec propre connaissance. Par exemple ou conné ki tel kitchose li noir et ou pé trouve li noir aussi mais ou dire ki li blanc. Ça veut dire ou fine cause menti. D’après Qour’aan-e-Kareem, ena malédiction lors banne ki commette ça genre de mensonge-là. Normalement ene dimoune li cause menti pou so l’avantage. Li trouvé ki li pou perdi point si li cause vrai. Ou bien li pou faire défaite si li dire la vérité. Mais ene dimoune bizin conné ki tout l’avantage ki nou pé rodé et tout ceki nou bizin li trouve dans la main Allah Ta’ala. Et ene dimoune pas capave gagne ça par désobéir Allah Ta’ala. Donc li gaspillage cause menti. Bénéfice ki ene dimoune capave gagné par mensonge, c’est ene bénéfice temporaire. Mais li vine ene prisonnier pou tout le temps. Astere li bizin cause dix menti mais là-aussi li pas reste cachiette pou tout le temps. Si ici fine réussi traversé, là-bas li pas pou sappé. Là-bas li pou pli grave parceki so défaut pou dévoilé divant toute l’humanité. Ça veut dire ki zordi non, demain, vrai visage de chakene parmi nou pou dévoilé.

Ene dimoune vraiment digne et respectable pas capave cause menti. Ene dimoune digne li bizin ene dimoune honnête. Cause menti li contre l’honnêteté. Ça veut dire ene dimoune ki cause menti pas capave vine ene dimoune honnête. Donc par cause menti, ene dimoune li sorti en dehors la liste banne ki digne et honnête. En d’autre mot ene dimoune ki cause menti li ene dimoune indigne et malhonnête.

Tanne dire ki ou pas capave vine ene politicien aussi longtemps ki ou pas cause menti. Si ça li vrai, alors li donne ou ene l’idée de ceki banne dirigeants dans le monde entier été. Souhaitons ki li pas coumsa dans nou ti paradis. Mais l’apparence li pas en faveur de ça souhait-là.

Mensonge en ceki concerne Deen li encore pli grave. Exagéré dans présente ene kitchose de Deen ou bien minimise l’importance de ene kitchose ki important, li représente ene camouflage ki li ene genre de mensonge. Sanla li pli grave parceki ça li faire Deen et Iman toute ene communauté souffert. Ene quantité dimoune tombe dans l’égarement et zotte éloigné de la vérité.

Parfois ene dimoune li arrivé dire ene kitchose avec toute sincérité et d’après ceki li croire au profond de li même. Plitard li arrivé comprend ki ceki so camarade fine dire, li ena parfaitement raison. Dans ene cas pareil li bizin rétracté de so confusion et so erreur. Dans ene situation semblable, reste tranquille et pas dire narien c’est ene camouflage de la vérité. Et ça li représente ene mensonge. En faisant cela li pé commette ene malhonnêteté envers Deen et li pé induire so banne partisans dans l’erreur et li pé laisse zotte continué reste dans l’erreur. Et ça li bien grave. Tandis ki banne dimoune digne et honnête zotte pas hésité pou rétracté quand zotte arrivé conne zotte erreur. Banne grand personnages couma Imam Abou Hanifah (R), Imam Malik (R), Imam Shafï (R) et Imam Ahmad Bin Hambal (R), zotte tout fine rétracté sans aukene hésitation à chaque fois ki zotte fine saisi zotte erreur. C’est necque banne ki dans la bassesse même et banne ki indigne dans zotte nature ki oulé cachiette derrière fausse maquillage de dignité et l’honneur par commette le grave et vilain péché de mensonge. Mais malheureusement zotte pas réussi atteigne so but apart ki zotte capave jouir lors ça la terre-là temporairement. Et finalement zotte bizin paye plis ki ceki zotte fine jouir. Punition dans akhirat li pli grave. Là-bas narien pas pou capave reste camouflé. Tou péché pou dehors.

"اللهم استرعوراتى وامن روعاتى

"O Allah ! Cachiette mo banne défauts et donne moi la paix de mo banne inquiétudes."

[Extrait de Al Jamiat Vol.5 No.4]