Namaz

Position namaz

Namaz li ene pilier très important de l’Islam. Selon ene hadice de Nabi ‎(Sallallaahou A'laihi Wasallam)‎, namaz li ene colonne important ki Deen même tini lors-là. Celui ki observe ça, veut dire ki li fine préserve so Deen et celui ki fine abandonne ça, li couma dire li fine démolir so Deen.

Hazrat ‘Oumar ‎(Radiyallahou anhou‎)‎ dire ki kitchose pli important dans Deen c’est namaz. Celui ki pou observe namaz, li pou observe lezot kitchose pli bien. Par contre celui ki néglige li, li pou néglige lezot kitchose encore pli bien. Namaz li ene signe de ene musulman. La différence ki trouve entre ene musulman et ene non musulman, c’est namaz. Ene dimoune li faire li ressemblé avec ene non musulman par néglige namaz. Li bien triste pou constaté ki banne musulman pencore saisi et comprend la valeur de ça fortune ki nou appelle namaz. Ça même li sufi pou montré so l’importance ki namaz li représente ene conversation entre le serviteur et so Rabb.

Namaz dans l’heure

Nabi ‎(Sallallaahou A'laihi Wasallam)‎ fine qualifié faire namaz dans so l’heure de meilleur action.

Chaque l’heure namaz ena ene commencement et ene la fin. Li pou dans l’heure quand nou fini faire li avant so l’heure terminé. Acoze ça li pli bon ki nou faire dans commencement même. Surtout nou bizin prend boucou précaution pou namaz Assar. Faudré pas nou tarde li ene quantité ki soleil li change couleur et li vine jaune. Li bien pas bon retarde namaz Assar ziska ça l’heure-là. Mais si jamais soleil fine fini vine jaune et ene dimoune pencore faire namaz Assar, alors li faire namaz-là dans ça l’heure-là même. Vaut mieux faire li dans ene l’heure pareille ki atane pou faire li après l’heure.

Namaz après l’heure

Li bien important ki ene dimoune faire so namaz dans so l’heure. Li pas faire li avant l’heure parceki li pas pou compté. Ni li retarde li ziska ki so l’heure fini sorti parceki li pou vine Qaza. Li ene péché grave pou faire ene namaz vine qaza.

Exception

Ena deux places cote ene namaz li faire avant so l’heure ou bien li faire après l’heure. Dans Arafah namaz Assar li faire ensemble avec namaz Zohar dans l’heure Zohar. Mais bizin satisfaire certaine conditions pou capave faire li dans ça façon-là.

Coumsa même  dans Mouzdalifah, banne haji zotte faire zotte namaz Maghrib ensemble avec Esha dans l’heure Esha. Apart ça deux l’occasion-là pena aukene l’occasion cote capave faire ene namaz en dehors so l’heure. Ena banne hadices ki laisse croire ki Nabi ‎(Sallallaahou A'laihi Wasallam)‎ ti faire namaz Zohar et Assar dans ene seul l’heure pendant voyage. Coumsa même li ti faire namaz Maghrib et Esha dans l’heure Esha. Mais quand nou guette banne hadices pli détaillé, li montré ki Nabi ‎(Sallallaahou A'laihi Wasallam)‎ ti faire chaque namaz dans so l’heure mais li ti pé paraite dans ene seul l’heure acoze li ti pé faire premier namaz dans dernier l’heure et deuxième namaz dans premier l’heure. Donc zotte ti pé paraite ensemble mais chakene ti faire dans so l’heure. Pas ti faire ene namaz dans l’heure l’autre namaz. Bizin prend boucou précaution concernant namaz. Bizin faire li dans so l’heure.

Faire namaz posément

Normalement nou pas pressé pou termine nou causé quand nou gagne l’occasion joine nou bien aimé. Et parfois pas senti même couma le temps passe vite. Coumsa même ene dimoune li prend tout so le temps quand li ena ene programme intéressant. Li pas content ki programme-là termine vite.

Pendant ki ene dimoune faire namaz, li communiqué avec Allah Ta’ala. Eski Allah Ta’ala li pas nou bien aimé? Sans doute Allah Ta’ala li nou bien aimé. Et nou bizin content Allah Ta’ala plis ki tous. Donc quand nou dans namaz, faudré pas nou faire vite avec ça. Nou bizin faire li posément sans pressé. Nou bizin pensé ki nou en pleine communication avec nou Rabb. Faudré pas nou agacé. Li pou ene très mauvais signe de nou part. Pou reste concentré dans namaz, li sufi pou ene dimoune ki li conscient de ceki li pé faire. Li pas faire ene namaz automatique. Mais li pense-pensé li faire chaque posture afin ki so le cœur li reste engagé dans namaz. Après ene certaine l’époque ou pou senti ki ou pas pé rode lève la tète depi dans sajdah. C’est ene réalité ki nou banne ancêtres fine vive li et fine expérience li. Si ena pou la guerre, nou bizin la guerre ça l’héritage noble-là. A noté ki banne imaam dans masjid, zotte bizin faire ene namaz bien équilibré, modéré et léger. Faudré pas faire li trop long parceki ena tout qualité dimoune dans jamaate. Faudré pas nou faire li dans ene façon ki ça li vine lourd pou banne dimoune ki dans l’age ou bien banne dimoune malade. Nou bizin faire bien attention. Faire namaz posément pas veut dire tardé dans namaz. Ene namaz capave faire li posément mais malgré ça li capave être ene namaz léger.

Namaz avec jamaate

Tanque possible, ene dimoune bizin faire so namaz avec jamaate dans masjid. Faire namaz avec jamaate li ene de banne principes ki garantie hidaayat pou la personne ki pratique li régulièrement.

[Extrait de Al Jamiat Vol.5 No.4]