La-ilaaha illallaah …

 Pena aukene être ki mérite adoration apart Allah Ta’ala. Namaz roza zakaat hajj et tout ibaadat en général bizin faire pou seulement Allah Ta’ala. Si fine faire ça pou montré lizié dimoune, alors ça li contraire de ça kalimah ki nou pé lire et lors la base de laquelle nou considère nou musulman.

Non seulement nou bizin faire ibaadat pou Allah Ta’ala, nou bizin place nou confiance aussi lors seulement Allah Ta’ala. Tout ceki pé arrivé dans dounia, c’est nom de dire ki nou trouve ki pé arrivé par un tel ou pou tel raison mais en réalité ena la main Allah Ta’ala derrière tout ceki pé arrivé. Acoze ça, ene musulman bizin garde confiance lors Allah Ta’ala seulement. Li talle so la main necque devant li. Li dimane tout ceki li bizin avec li même seulement parceki tout ceki li ena pou gagné, li pou gagne li avec Allah Ta’ala même.

Sheikh Abdul Qadir Jeelani (R) dire:

"Tout dimoune ki to attache to l’avantage ou désavantage avec li et to croire ki Allah Ta’ala même pou faire ça arrivé dans so la main, alors ça veut dire ki to fine considère ça dimoune-là to Ma’boud (celui ki mérite adoration)." (Fouyouz-e-Yazdaani Majlis 20)

… Mouhammad Rasouloullah ‎(Sallallaahou A'laihi Wasallam)‎

Hazrat Mouhammad ‎(Sallallaahou A'laihi Wasallam)‎ li l’envoyé d’Allah Ta’ala. C'est-à-dire Allah Ta’ala fine choisir li pou transmette le message. Ça message-là li comprend tout ceki ene dimoune bizin faire et tout ceki li pas bizin faire en tant ki individu et aussi au niveau collectif. Ça façon vive-là li la seule façon correcte et authentique et fiable parceki c’est la façon révélée, indiqué et fine ordonné par le Créateur Suprême ki conne très bien chaque problème et li conne très bien so solution et so remède aussi. Par accepté Hazrat Mouhammad ‎(Sallallaahou A'laihi Wasallam)‎ comme l’envoyé Allah Ta’ala, ene dimoune li engage li pou vive d’après ceki li fine enseigné et rejette tout ceki oppose ça. Imaan ene dimoune li pas complété sans ça l’engagement-là et sans vive d’après ça l’engagement-là.

[Extrait de Al Jamiat Vol.5 No.4]