Zikrullah

"Comparaison entre ene ki pense so Rabb et ene l’autre ki na pas pensé, c’est ene comparaison ki existé entre ene dimoune vivant et ene dimoune mort."

Explication:

Ene dimoune vivant li profitable pou li même et pou lezot parceki li ena liberté d’agir et liberté pou exerce banne activités. Ene dimoune mort pena ça liberté-là. Donc li vine ene dimoune inservable. Coumsa même ene dimoune ki pense so Rabb, d’abord li faire li même immense du bien et li vine ene source de bienfait pou lezot. Parceki ene dimoune ki pense so Rabb, li ena ene considération très très particulier non seulement pou banne insaan pareil couma li, mais li considère ziska banne zanimau aussi zot banne droits. C’est ene personne ki conne so devoir et responsabilité avant li réclame so droit. Li décharge so responsabilité pleinement sans li dépasse limite de so droit et peut être parfois li capave arrête bien avant de so limite même. C'est-à-dire li cède so droit sans ki li lèse kikene de so droit. Définitivement ene personne pareil li ene grand bienfait pou l’humanité. Et à la lumière de ça hadice-là, ene dimoune li arrive dans ça stage et ça degré-là par reste dans pense so Rabb.

Zikrullah c’est ene forteresse

"Mo ordonne zotte pou faire zikrullah parceki l’exemple ene dimoune pareil li couma dire ene dimoune ki l’ennemi fine après li avec toute vitesse ziska ki li fine arrive acote ene forteresse bien solide (cote li prend refuge) et li fine sauve so la vie de ça banne-là. Dans la même façon ene serviteur pas capave protége li de shaitaan sans zikrullah …" (Tirmizi)

Explication :

C’est ene longue hadice rapporté dans Tirmizi ki qualifié de ene hadice authentique. C’est ene message ki le Nabi Hazrat Yahya ‎(Alaihis Salaam)‎‎ ti gagné avec Allah Ta’ala pou transmette à so peuple. D’après ça hadice-là zikrullah li couma ene forteresse. Couma forteresse li ene protection dans sure contre l’ennemi, coumsa même zikrullah non seulement li ene protection, mais c’est le seul moyen pou protége ene dimoune contre shaitaan. Mais l’efficacité de ça protection-là li dépanne lors la qualité de zikrullah. Si li ene zikrullah complète, alors protection aussi pou ene protection bien complète. La quantité manquement ki pou ena dans zikrullah, ça li pou reflecté lors la qualité de protection. A chaque moment ene dimoune li exposé à l’attaque de shaitaan ki pena aukene mission apart faire li ditort. D’après ça hadice-là kitchose ki pou protége li de ça l’attaque-là c’est zikrullah.

Donc insaan bizin ena zikrullah dans li à chaque instant. L’obéissance totale à Allah Ta’ala c’est la forme la plus élevée de zikrullah. Donc l’obéissance totale à Allah Ta’ala c’est ene protection solide, sure et permanente pou ene insaan contre shaitaan.

D’après ene hadice ki rapporté dans Sahih Boukhari par Hazrat Abdullah Bin Abbaas ‎(Radiyallahou anhou‎)‎, Rassouloullah ‎(Sallallaahou A'laihi Wasallam)‎ dire :

"Shaitaan li reste tassé lors le cœur insaan. Quand li faire zikr, li avancé et quand li blié (arrête pense Allah) li (shaitaan) mette mauvais pensé."

Shaitaan li influence dimoune pou faire péché par inspire li banne mauvais pensé dans so le cœur. Le moyen pou empêche shaitaan faire ça dégât-là c’est zikrullah. Dans ça façon-là zikrullah li ene moyen ki empêche ene dimoune désobéir Allah Ta’ala. Parceki shaitaan li tente dimoune pou faire péché par mette banne mauvais pensé dans so le cœur. Tanque ene dimoune li reste engagé dans zikrullah, li reste dans protection Allah Ta’ala et shaitaan pas capave influence li. C’est ene protection ki ene dimoune bizin li tout le temps. Acoze ça, Nabi ‎(Sallallaahou A'laihi Wasallam)‎ ti recommane ene Sahabi pou garde so la langue engagé dans zikrullah :

"… laisse to langue trempé dans zikrullah continuellement." (Tirmizi)

[Extrait de Al Jamiat Vol.5 No.6]