Deux rakaat avant namaz Maghrib

Hazrat Abdullah Al-Mouzani ‎(Radiyallahou anhou‎)‎ rapporté ki Nabi ‎(Sallallaahou A'laihi Wasallam)‎ fine dire:

"Faire namaz avant namaz maghrib et lors troisième coup li fine dire (ça l'ordre-là li) pou celui ki envi (faire li) par précaution ki dimoune pas prend li pou ene principe régulier." (Sahih Boukhari)

Explication:

Dans ça hadice-là Nabi ‎(Sallallaahou A'laihi Wasallam)‎ ti donne l'ordre pou faire namaz avant namaz maghrib. Ça namaz ki Nabi ‎(Sallallaahou A'laihi Wasallam)‎ fine donne l'ordre, c'est ene namaz nafil ki li fine dimane pou faire li après azaan avant faire faraz Maghrib.

Nabi ‎(Sallallaahou A'laihi Wasallam)‎ fine dire ça trois fois et lors troisième fois, li fine laisse option ouvert pou ceki oulé capave faire li et ceki envi li capave pas faire li aussi. Donc ça l'ordre pou faire ça 2 rakaat-là li ene l'ordre optionnel. Li pas obligatoire. Et si lors troisième fois Nabi ‎(Sallallaahou A'laihi Wasallam)‎ fine dire ceki envi faire li alors li faire li, c'est necque par précaution ki ça pas vine ene pratique lors ene base permanent. Donc d'après ça hadice-là, li paraite ki ça 2 rakaat-là li ene pratique autorisé mais Nabi ‎(Sallallaahou A'laihi Wasallam)‎ pas ti content ki so 'Oummah faire ça vine ene pratique régulier.

Hadice Hazrat Anas ‎(Radiyallahou anhou‎)‎

Hazrat Anas Bin Malik ‎(Radiyallahou anhou‎)‎ fine rapporté quand mou'azzin ti pé commence azaan, ene groupe de Sahaba-e-Kiraam de Nabi ‎(Sallallaahou A'laihi Wasallam)‎ ti pé galoupe vers banne colonnes (dans masjid pou faire namaz) ziska ki Nabi ‎(Sallallaahou A'laihi Wasallam)‎ (ti gagne le temps) sorti et zotte ti pé encore faire les deux rakaat avant maghrib. Et pas ti ena presque narien (comme le temps) entre azaan et iqaamate. (Sahih Boukhari)

Explication:

D'après ça hadice-là, ene groupe de Sahaba-e-Kiraam ti pé faire 2 rakaat avant namaz maghrib. Et zotte ti commence faire dés ki mou’azzin ti pé commence so azaan. Zotte pas ti pé atane azaan terminé ni Nabi ‎(Sallallaahou A'laihi Wasallam)‎ ti pé alloué ene le temps spécial pou faire li. Donc c'était ene pratique autorisé. Mais li paraite ki là plupart pas ti pé faire li. Ça li ene indication ki li pas ti ça important-là ni li ti ene pratique établie lors ene base permanent. Ça li paraite pli clair quand nou trouvé ki Nabi ‎(Sallallaahou A'laihi Wasallam)‎ pas ti pé alloué aukene le temps supplémentaire pou faire ça.

Selon ene hadice ki trouve dans Abou Dawoud avec ene chaîne de narration authentique, en réponse ene question ki kikene ti pose Hazrat Abdullah Bin 'Oumar ‎(Radiyallahou anhou‎)‎ concernant 2 rakaat avant maghrib, Hazrat Abdullah Bin 'Oumar ‎(Radiyallahou anhou‎)‎ fine faire ressortir:

"… Mo pas fine trouve personne faire li (c-à-d 2 rakaat avant maghrib) dans l'époque Rassouloullah (‎(Sallallaahou A'laihi Wasallam)‎) ... " (Abou Dawoud)

Li impossible ki banne Sahaba-e-Kiraam ti pé faire li et Hazrat Abdullah Bin 'Oumar ‎(Radiyallahou anhou‎)‎ pas fine trouve personne faire li. Li paraite ki ça 2 rakaat avant maghrib ti existé pendant ene certaine l'époque. Après ene le temps ça ti arrête pratiqué dans l’époque Nabi ‎(Sallallaahou A'laihi Wasallam)‎ même. Concernant ça même l'époque ki Hazrat Abdullah Bin 'Oumar ‎(Radiyallahou anhou‎)‎ pé dire ki li pas fine trouve personne faire ça. Banne Sahaba-e-Kiraam couma Hazrat Abou Bakr ‎(Radiyallahou anhou‎)‎, Hazrat 'Oumar ‎(Radiyallahou anhou‎)‎, Hazrat Usmaan ‎(Radiyallahou anhou‎)‎ et Hazrat Ali ‎(Radiyallahou anhou‎)‎ pas ti pé pratique ça. Ça aussi li ene preuve ki li pas ti ene pratique ki ti en vigueur pou tout le temps. Ene dans l'autre li paraite ki de commencement même, pas tous banne Sahaba-e-Kiraam ki ti pé pratique li. Coumsa même li pas ti ene pratique ki fine continué. 

Hadice Hazrat Jabir ‎(Radiyallahou anhou‎)‎

Hazrat Jabir ‎(Radiyallahou anhou‎)‎ rapporté : "Nou fine dimane banne madames Rassouloullah ‎(Sallallaahou A'laihi Wasallam)‎ : Eski zotte fine trouve Rassouloullah ‎(Radiyallahou anhou‎)‎ faire 2 rakaat avant maghrib?" Zotte fine dire non apart ki Hazrat Umme Salamah ‎(Radiyallahou anhou‎)‎ fine dire: "Ene fois li ti faire ça acote moi et mo ti dimane li ki ça namaz-là ça. Lerlà li ti dire: mo ti blié les 2 rakaat avant Assar alors mo fine faire li aster-là." (Tabraani)

Position hadice:

Ça hadice-là li ene hadice Hassan.

Explication:

Banne Sahaba-e-Kiraam fine dimane banne madames Rassouloullah ‎(Sallallaahou A'laihi Wasallam)‎ à propos ça 2 rakaat là pareil couma ti ena ene groupe ki ti dimane ça avec Hazrat Abdullah Bin 'Oumar ‎(Radiyallahou anhou‎)‎. Hazrat Abdullah Bin 'Oumar ‎(Radiyallahou anhou‎)‎ ti repone ki li pas fine trouve personne faire ça dans l’époque Rassouloullah ‎(Sallallaahou A'laihi Wasallam)‎. Et coumsa même banne madames Rassouloullah ‎(Sallallaahou A'laihi Wasallam)‎ fine repone ki zotte pas fine trouve Rassouloullah ‎(Sallallaahou A'laihi Wasallam)‎ faire ça 2 rakaat-là.

Ki fine capave pousse banne Sahaba-e-Kiraam pou pose ene question pareil?

Li paraite ki zotte fine trouve hadice ki autorise ça deux rakaat-là mais pratiquement li ti inexistant. Ça veut dire ki dans l'époque banne Sahaba-e-Kiraam même ça pas ti pé être pratiqué. Ça c'est ene signe ki li pas sounnat. Forcé-forcé capave dire ki li ene pratique autorisé et ça aussi faudré pas adopté li lors ene base permanent. Pou certains ‘Oulama ça deux rakaats-là ti permette zisse pou montré ki ça l’heure ki namaz nafil li empêché faire, li terminé après le coucher du soleil. Quand banne Sahaba-e-Kiraam fine comprend ça bien, alors ça pratique-là fine arrêté.

Comme récapitulation, nou capave dire ki ça deux rakaat-là ti ene simple autorisation. Faudré pas adopté li couma ene pratique permanent et régulier. Ni bizin alloué ene le temps spécial pou ça. Donne ene morceau le temps spécial pou faire ça et faire li régulièrement, li paraite contraire à sounnat et au souhait de Nabi ‎(Sallallaahou A'laihi Wasallam)‎ à la lumière hadice Hazrat Abdullah Al-Mouzani ‎(Radiyallahou anhou‎)‎et Hazrat Anas ‎(Radiyallahou anhou‎)‎.

[Extrait de Al Jamiat Vol.5 No.6]