Pas joué avec la vie

Quand ou ena ene bon travail pou faire, faudré pas ou renvoye renvoye li. Shaitaan li là pou mette ene tas prétexte devant nou pou capave finalement décourage nou faire ceki nou envi faire. Par faire nou post-pone ene

zaffaire, shaitaan li necque oulé gagne suffisamment le temps pou dévié nou. Nou bizin pas donne shaitaan ça l’occasion-là.

Quand ou ena ene bon kitchose dans ou la tête, necque faire doah et commence faire li lors confiance Allah Ta’ala. Au fur et a mesure ou pou trouve li pé vine facile et même agréable et délicieux aussi. Disons ziska l’heure ou pas fine commence faire namaz. Necque ena pou commence faire namaz. Ou même ou pou trouvé ki li extra bon. Li pas difficile. Ou pou trouvé ki ça fine organise ou la vie ki ti impé en désordre auparavant. Si ou atane ramadwan vini pou ou commencé, bé ça ou reste atane même ça.

Ena boucou kitchose capave arrivé avant ou joine ramadwan. Parfois ou dire laisse mo fini faire hajj, lerla mo attrape mo Deen carré-carré. Là aussi ou pé embette ou. Pli ou tardé, pli le temps pé allé et pli ou pé approché avec ou destination. Ena boucou parmi nou ki pense pou attrape Deen quand zotte prend pension. Ça aussi li bien risquant. La vie pena confiance quand li quitte ou li allé. Ena ki pencore marié et pé attane fini marié pou li dresse so la vie. Li bien embêtant parceki attrape Deen veut dire vine sincère avec le Créateur. Eski pou vine sincère envers le Créateur aussi bizin tick-tické ? Pas joué avec ou la vie. Li bien courte ça. Faire ceki bizin faire avant li quitte ou li allé. Na pas bizin pensé ki pou arrive ou, ou bien ou la famille ou bien ou travail ou banne camarade et ou l’entourage couma pou réagir quand ou change ou traîne de la vie. Quand ou fine réussi vine pou Allah Ta’ala, li même li pou dresse tout pou ou.

[Extrait de Al Jamiat Vol.5 No.7]