Ene allé sans retour

La mort c’est ene allé sans retour. Dimoune pas revine lors la terre quand li fini mort. Regret après la mort li pas servi narien. Si ene dimoune rode retourné aussi, li pas pou capave retourné.

Donc li dans l’avantage ene dimoune ki li faire ceki li ena pou faire avant li vine trop tard. Surtout li bizin répare banne manquements avant li quitte ça dounia-là.

Pou certain, la mort li la fin de tout. Mais pou ene musulman, li necque la fin de la vie lors ça la terre-là. En réalité ça li le commencement de ene la vie ki pou existé ziska tout le temps. Ena ki pou reste dans so bien-être pou tout le temps couma ena ki pou souffert éternellement. Celui ki fine amène so la vie couma bizin, li pou dans bien. Par contre celui ki fine passe so la vie dans désobéissance, li pou ena ene souffrance interminable.

Ki Allah Ta’ala protége nou tous de ça. Ameen !

C’est ene vérité ki bien tigite dimoune conné. C’est ene vérité ki bien tigite dans tigite ki réglé zotte la vie d’après ça. La grande majorité pas comprend ou bien zotte pas oulé comprend ou bien zotte déclare pas comprend. De toute façon sans accepté ça vérité-là, dimoune pas capave vine dimoune. Li pou toujours amène so la vie dans ene façon ki pas digne à so nom ki li porté. L’indécence, l’immoralité, manque de pudeur, c’est banne l’effets inévitable de reste insensible à ça realité-là. C’est ça l’état cote ene dimoune arrête pense ou arrête croire dans ça trajet sans retour et dans ceki pou arrive li après.

[Extrait de Al Jamiat Vol.5 No.8]