Façon pli facile pou corrige nou erreur

Quand nou fine faire ene erreur, faudré pas nou déconcerté et nou rode justifié li. Pli simple nou accepté nou erreur, nou faire tawbah et nou prend précaution pou pas refaire li dans l’avenir.

Justifié dans vide ene erreur ki ou fine faire li couma dire ou pas oulé accepté ki ou ena ene maladie ki pourtant ene bon médecin pé dire ou li. Dans ene situation pareil ni ou pou accepté ni ou pou soigne ou. Finalement c’est ou même ki pou capave attrape ene maladie incurable ki pourtant ti capave évité si ou ti accepté conseil ou médecin. La même chose arrivé en ceki concerne Deen. D’abord ene dimoune li faire ene kitchose avec toute sincérité. Pli tard attiré par kikene, li arrivé comprend ki li ti dans erreur. Mais l’orgueil monte dans la tête. Li pas oulé perdi point. Li senti li abaissé dans admette so erreur et pourtant banne ki vraiment honorable, noble et respectable même ki pas senti zotte abaissé dans accepté zotte erreur. Aster li commette dix erreurs zisse pou camouflé ene erreur. Mais maquillage reste maquillage. Ene jour pas ene jour li bizin tombé. Si pas ici, là-bas dans aakhirat li bizin tombé. Eski li pas pli facile pou accepté ene seul ki mette dix lors la tête ? Acoze ça, pli facile, nou bizin prend bien précaution avant nou dire ou bien avant faire ene kitchose. Si jamais fine ena erreur, alors jamais bizin hésité pou rétracté. Sans tardé admette ou erreur et prend banne mesures pou ça pas répété dans l’avenir. Mette dans la tête bien ki justifié ene erreur li ene élément cancéreux pou imaan et Deen.

[Extrait de Al Jamiat Vol.5 No.9]