Récompense de 100 hajj

"Celui ki lire ‘Subhanallah’ 100 fois le matin et 100 fois dans l’apres midi, li pou vine couma dire ene dimoune ki fine accomplir 100 hajj." (Tirmizi)

Imam Tirmizi fine qualifié ça hadice-là de ene hadice hassan c'est-à-dire li ene hadice passable. D’après ça hadice-là, celui ki faire Subhanallah 100 fois le matin et 100 fois tantôt, li gagne récompense pareil couma ene dimoune ki fine faire 100 hajj.

Faire hajj li dimane boucou sacrifice en terme physique, finance et le temps. Ene dimoune li capave bénéficié récompense de non seulement ene hajj mais 100 hajj et ça aussi sans bougé depi dans so l’endroit. Necque li ena pou faire 100 fois Subhanallah le matin et 100 fois dans l’après midi. Ça li suffit pou montré valeur faire tasbeeh ki pourtant dimoune guette ça avec légèreté. Trésor Allah Ta’ala pas manque narien et jamais li diminué. Acoze ça li pas difficile pou Allah Ta’ala accorde grand grand récompense pou ene action ki paraite aussi facile ki pas dimane grand zeffort. Ça capave paraite exagéré par rapport à nou moyen et nou capacité bien minime et bien limité mais li narien ditou par rapport à Allah Ta’ala ki so trésor li immense et inépuisable. Li paraite bien facile mais pas pou tout dimoune. Li facile necque pou celui ki Allah Ta’ala fine donne li le tawfeeq. Sinon ena ene quantité ki ena toute sorte facilité, faculté et capacité mais zotte pas capave faire li. Celui ki Allah Ta’ala fine donne li le tawfeeq, li bizin boucou reconnaissant envers Allah Ta’ala sans être fier et sans kit complexe de supériorité. Ça Insha Allah pou ouvert la porte de encore lezot bienfaits.

A noté ki ene dimoune ki hajj fine vine faraz lors li, li bizin alle faire hajj même pou li acquitté de so responsabilité. Faudré pas li pensé ki ça récompense de autant centaine de hajj-là li suffit de la part de so hajj faraz parceki ça récompense-là li récompense de banne hajj nafil. Mais li pas capave faire li acquitté de so hajj faraz. Li bizin absolument faire li. Ça li pas pou acquitté par tasbeeh.

Li bien triste ki zordi jour nou pé gaspille nou le temps dans banne activités inutiles ki pourtant ti capave servi dans banne actions bien bien bénéfiques. Eski li pas chagrinant ki ene la monnaie ki ti capave servi pou soulage banne ki dans la misère pé être servi pou mette poison dans le corps ? Coumsa même li bien chagrinant ki ene le temps ki ti capave servi pou bâtir ou jannat, pé servi pou facilite le chemin vers jahannam.

[Extrait de Al Jamiat Vol.5 No.9]