Voyage tout seul pou ene madame

“Ene madame faudré pas li voyage (ene distance) trois jours sans ki li ensemble avec ene mahram.” (Saheeh Boukhari)

Explication :

Ene distance trois jours veut dire ene distance ki ene voyageur capave couvert dans trois jours. Dans l'époque longtemps dimoune ti pé voyage lors chameau. Donc ene distance trois jours signifié ene distance ki ene dimoune capave couvert dans trois jours par chameau. Couma nou conné ki zotte pas ti pé voyage 24 lors 24, c'est necque ene parti dans ça 24 hrs là ki zotte ti pé voyagé. Dans ça ene parti voyage-là, zotte ti pé couvert 16 miles par jours. Donc ene distance de trois jours c'est 48 miles. Zordi jour nou ena banne moyen transport bien bien rapide. Ça distance ki zotte ti pé prend 3 jours pou couvert li longtemps, zordi avec facilité ki nou ena, nou capave faire li dans trois minutes aussi. Ceki important là-dans c'est ça distance-là, pas ça trois jours-là. Donc ene madame pas gagne droit voyage ça distance-là sans être accompagné par ene mahram, quand même li faire li dans pli tigite le temps ki ça 3 jours-là.

Ki veut dire mahram ?

Ene mahram pou ene madame c'est ene zomme ki ça madame-là pas gagne droit marié avec li jamais couma madame-là so papa, so garçon, so banne ti zenfants, so frère, so neveu, banne zenfants so neveu ou bien banne zenfants so nièce, so nana, so dada, so mamou, so chacha. Ça li appliqué pou tous madame en general. Quant à ene madame marié, alors soit li accompagné de so missié ou bien ene dans ça banne-là. A noté ki beau-frère, poupa, kalou, cousin ou bien zenfants cousin cousine zotte pas mahram. Coumsa même banne grand dimoune ki ou appelle zotte nana, dada, mamou, chacha ou bien frère par l’amitié ou par respect, zotte continué reste étranger. Zotte pas vine ou mahram.

Mahram par relation dilait

Couma ene zomme li vine mahram pou ene madame par relation du sang, coumsa même li capave vine mahram par relation du lait aussi. C'est-à-dire quand ene ti baba boire du lait avec ene madame, alors ça madame-là so missié vine ça ti baba-là so papa du lait. Ça madame-là vine mama du lait. Madame-là so banne zenfants et banne lezot zenfants ki li fine faire boire du lait vine ça ti baba-là so banne frère-sœur du lait. Coumsa même madame-là so frère vine ça ti baba-là so mamou du lait. Donc couma ene madame li gagne droit voyagé avec so propre garçon du sang, coumsa même li gagne droit voyage avec so garçon du lait. Mais dans tout ça-là li important ki ça ti baba-là fine boire du lait quand li pas ti encore gagne deux ans. Si jamais li boire du lait avec ene madame dans l’age après deux ans, alors ça boire du lait-là pas pou faire li vine garçon du lait ça madame-là.

Mahram bizin majeur et sain d’esprit

Ene mahram couma li bizin ene personne ki majeur, coumsa même li important ki li sain d’esprit. C'est-à-dire ene garçon mineur pas capave servi comme ene mahram dans voyage pou ene madame. Coumsa même ene personne ki pas sain d’esprit pas capave servi comme ene mahram dans voyage.

Bizin mahram pou tou voyage

Dans ça hadice-là, Rasouloullah ‎(Sallallaahou A'laihi Wasallam)‎ pas fine spécifié aukene sorte de voyage. Donc ça li applique pou tout qualité voyage ki ene dimoune faire dans ene façon délibérée. Par exemple voyage de promenade, voyage de commerce et voyage de l’étude. Ça la loi-là li applique en général pou tout voyage. A moins si ena kit nécessité réelle. A ce moment-là li pou permette et li pou exempté de ça règle général-là. Par exemple ene madame ki ena pou alle à l’extérieur pou faire soigne li ou bien pou ene traitement médical ki pas gagné cotte li dans so pays. Alors si li pena mahram, dans ça cas-là, exceptionnellement li gagne droit voyagé li tout seul.

Mahram pendant ‘oumrah et hajj

Eski ‘oumrah ou bien hajj li ene nécessité ki autorise ene madame voyagé li tout seul sans mahram ? Le fait ki Rasouloullah ‎(Sallallaahou A'laihi Wasallam)‎ pas fine spécifié aukene sorte de voyage et li fine laisse li vague, alors de par so sens général li bizin applique pou ene voyage de ‘oumrah et de hajj également. Parceki d’après pena aukene blâme lors ene madame si li pas fine réussi faire ‘oumrah ou bien hajj acoze ki li pena mahram. A noté ki tanque li pena ene mahram ki accompagne li, hajj pas vine obligatoire lors li pou accomplir li même en personne. Si li pas réussi faire li dans so vivant, li bizin toujours fini faire ene testament pou ki so banne z’héritiers capave envoye kikene faire hajj de so coté après so la mort. Tout ça-là montré ki ‘oumrah et hajj li pas ene nécessité dans cas ene madame ki pena mahram. Alors ça hadice-là pou applique pou voyage ‘oumrah et hajj aussi, surtout quand d’après banne juristes couma Hassan Al-Basri, Ibrahim An-Nakhi-ï, Imaam Abou Hanifah, Imaam Ahmad, Ishaaq et Abou Thaur, hajj li pas vine obligatoire lors ene madame ki pena mahram.

Nou ena ene hadice dans Saheeh Boukhari rapporté par Hazrat Abdullah Bin Abbaas ‎(Radiyallahou anhou‎)‎ ki confirme dans ene façon assez clair ki ene madame bizin être accompagné par ene mahram pou le voyage de hajj aussi. Selon ça hadice-là, Rasouloullah ‎(Sallallaahou A'laihi Wasallam)‎ fine dire dans ene certaine l’occasion :

"Ene madame faudré pas li voyagé sans ki ena ene mahram avec li. Ene zomme faudré pas li rente cote ene madame sans ki li (madame-là) ena ene mahram avec li."

Ene Sahabi ki ti là-bas fine demandé :

"O Allah so Rasoul ‎(Sallallaahou A'laihi Wasallam)) mo ti ena l’intention pou sorti dans tel ou tel l’armée. Et mo madame pé faire l’intention hajj ?"

En réponse Rasouloullah ‎(Sallallaahou A'laihi Wasallam)‎ fine dire li :

"Alle ensemble avec li."

Ça montré ki li bien important ki ene madame bizin être accompagné par ene mahram. Li pas gagne droit voyage li tout seul. Ça li tellement important ki Rasouloullah ‎(Sallallaahou A'laihi Wasallam)‎ fine ordonne le Sahabi pou abandonne l’intention sorti dans jihaad ki li ti déjà fini inscrire so nom, zisse pou li capave accompagne so madame dans hajj. Selon la version سعيد بن منصور, le Sahabi concerné ti faire نذر (vœux) pou li alle dans ça certaine jihaad-là. Par ordonne li pou accompagne so madame dans hajj, Rassouloullah ‎(Sallallaahou A'laihi Wasallam)‎ fine autorise le Sahabi concerné pou casse so promesse ki li ti faire pou sorti dans jihaad. Qour’aan et hadice fine mette boucou l’emphase lors la nécessité respecté ene promesse. Si malgré ça Rasouloullah ‎(Sallallaahou A'laihi Wasallam)‎ fine ordonne li pou abandonne ziska ça aussi, alors ça montré ki quantité li pli important ki ene madame pas alle hajj li tout seul sans être accompagné par ene mahram. Ça hadice-là montré ki l’ordre pou pas voyage sans mahram li applique pou voyage hajj aussi parceki ça sahabi-là fine comprend ça même et Rasouloullah ‎(Sallallaahou A'laihi Wasallam)‎ par so réponse fine confirme ceki le Sahabi fine comprend. Le hadice de Hazrat Abdullah Bin Abbaas ‎(Radiyallahou anhou‎)‎ li dans Mousnad Al-Bazzaar aussi avec ene certaine différence :

Hazrat Abdullah Bin Abbaas ‎(Radiyallahou anhou‎)‎ fine rapporté ki Rasouloullah ‎(Sallallaahou A'laihi Wasallam)‎ fine dire :

"Ene madame faudré pas li faire hajj sans ki li ena ene mahram avec li. Alors ene personne fine dire : “O Allah so Nabi ‎(Sallallaahou A'laihi Wasallam)‎ : Mo fine faire inscrire mo nom dans tel jihaad et mo madame pé alle faire hajj ? (Lors ça) Li (Rasouloullah ‎(Sallallaahou A'laihi Wasallam)‎) fine dire : Retourné et alle faire hajj ensemble avec li.” (Al-Bazzaar)

Selon la version ki trouve dans (سنن الدارقطنى) avec ene sanad authentique, Rasouloullah ‎(Sallallaahou A'laihi Wasallam)‎ fine dire :

“Ene madame pas bizin faire hajj sans ki li ena ene mahram avec li.” (Darqutni)

Mise au point :

Ena encore deux points ki dimane explication :

1. D’abord ena ene hadice ki faire mention de deux jours couma ena ene l’autre ki mentionne ene jour aussi. Banne hadices semblable zotte applique selon banne contextes et circonstances. C'est-à-dire cote ena sécurité et pena aukene danger, alors ene madame gagne droit voyage tout seul si li ene voyage de moins ki trois jours. Cote pena sécurité, alors li bizin être accompagné par ene mahram même si li ene ti distance aussi. Mais pou ene voyage de trois jours ou plis ki trois jours, de toute façon li bizin être accompagné par ene mahram, même si li paraite ki pena aukene danger ou l’insécurité aussi.
2. Deuxièmement d’après ene hadice dans Saheeh Boukhari, banne madames de nou Nabi ‎(Sallallaahou A'laihi Wasallam)‎ ti accompagné par Hazrat Usmaan ‎(Radiyallahou anhou‎)‎ et Hazrat Abdurrahmaan Bin Awf ‎(Radiyallahou anhou‎)‎ dans hajj. Ça c’était par l’ordre Hazrat ‘Oumar ‎(Radiyallahou anhou‎)‎. En réalité ça li pas en contradiction ça hadice cote Rasouloullah ‎(Sallallaahou A'laihi Wasallam)‎ fine empêche ene madame sorti dans voyage sans être accompagné par ene mahram. C’est parceki banne madame Rasouloullah ‎(Sallallaahou A'laihi Wasallam)‎ fine déclaré comme mama de tous banne musulmans par Allah Ta’ala.

“Nabi (‎Sallallaahou A'laihi Wasallam‎) li ena relation pli proche avec banne musulmans ki zotte ena avec zotte même et so banne madames c’est zotte mamans …” (S33/V6)

Alors banne musulmans, zotte banne mahram de banne madames Rasouloullah ‎(Sallallaahou A'laihi Wasallam)‎. Dans ce sens li correct pou dire ki pendant zotte voyage de hajj, zotte ti accompagné de zotte banne mahram. Li pas ti ene voyage sans mahram. Et si malgré ça, zotte fine gagne l'ordre pou observe pardah, c'est par respect et dignité ki Allah Ta'ala fine accorde zotte.

[Extrait de Al Jamiat Vol.5 No.10]