Rode défaut ou prochain

Allah Ta’ala dire :

« Pas bizin rode défaut (ou camarade). »

D’après ça morceau verset-là, Allah Ta’ala fine empêche nou rode kikene so défaut. Ena différent façon pou rode kikene so défaut. Ou mette zoreille ou écouté ki causé kikene pé causé. Ou bien ou ouvert kikene so lettre ou bien ou rente dans so mail box lors portable pou conné ki li pé faire. Coumsa même parfois dimoune capave dérangé alle cote kikene zisse pou gagne l’information lors kikene.

Tout ça banne façon faire espionnage kikene-là et rode conne so défaut, li ene manière de bassesse ki shariah pas autorisé. Donc c’est ene acte haraam et interdit. Tanque possible nou bizin pas fourné dans kikene so zafaire. Et si jamais nou arrivé conne défaut kikene, alors nou bizin garde li pou nou. Nou bizin pas dévoile li.

Ene dimoune so l’honneur et so dignité li ene kitchose bien sacré. Li ene devoir lors chaque musulman ki li préserve dignité et l’honneur so prochain. Celui ki préserve dignité so camarade par cachiette so défaut, en réalité li pé faire zeffort pou cachiette so propre défaut.

Parceki dans ene hadice nou Nabi ‎(Sallallaahou A'laihi Wasallam)‎ fine dire :

 « Celui ki cachiette défaut ene musulman, Allah Ta’ala pou cachiette so défaut jour qiyaamah. »

Si nou oulé ki jour qiyaamah Allah Ta’ala cachiette nou défaut et nou péché, alors nou bizin conne cachiette péché nou camarade. Personne pas capave pretanne ki li pena aukene défaut dans li. Tout dimoune bizin ena kit défaut dans li. Personne pas content kikene dévoile so péché. Alors nou bizin agir avec banne dimoune couma nou ti à content dimoune agir avec nous.

Dans ene l’autre hadice, Rasouloullah ‎(Sallallaahou A'laihi Wasallam)‎ fine dire :

« Pas galoupe derrière défaut ou frère musulman. Parceki celui ki galoupe derrière défaut so frère musulman, Allah Ta’ala pou galoupe derrière so défaut. Celui ki Allah Ta’ala pou galoupe derrière so défaut, li pou humilié li quand même li reste cachiette dans so la caze. »

D’après ça hadice-là, nou trouvé ki dimoune ki joué avec l’honneur dimoune, pas pou capave reste avec l’honneur li même. Ça veut dire nou l’honneur li trouve dans conne préserve l’honneur nou camarade. Garde l’honneur dimoune c’est ene façon pou reste honorable dans dounia et dans aakhirat.

Ki Allah Ta’ala accorde nou tous ça banne bon qualité-là ! Ameen.

[Extrait de Al Jamiat Vol.5 No.11]