… Surtout pou banne jeunes…

 "والذين يبيتون لربهم سجدا وقياما"

 « Et (banne serviteurs spécial d’Allah) c’est banne ki passe zotte la nuit devant zotte Rabb dans sajdah et dans posture diboute. »

Dans le verset, Allah Ta’ala pé cause so banne serviteurs ki impé pli spécial ki lezot.

C'est-à-dire passe la nuit dans ibaadat li faire ene dimoune vine ene serviteur d’Allah impé pli spécial. Li faire li vine prés avec so Rabb.

Quand nou analyse ça verset-là, nou trouvé ki quantité nou fine perdi et nou pé encore perdi dans nou la vie. Parceki d’abord boucou parmi nou, nou pas faire même namaz Esha. Et ceki faire li, li capave pas régulier dans so namaz. Et ceki li régulier, li faire ene quantité kitchose inutile dans la nuit. Li passe so le temps dans guette télévision ou bien avec so computer. Et ena ki pas faire namaz ditou et li perdi so le temps necque dans alle dans mariage, fiançailles, promenade etc.

Li bien chagrinant ki nou laisse banne l’occasion pareille allé ki ti pou approche nou pas avec n’importe ki sanla mais avec nou Rabb ki fine crée nou tous et fine crée tout kitchose ki autour de nou. C’est nou Rabb ki so trésor li rempli avec tout ceki nou bizin et ceki nou envi.

Si ene dimoune pena courage pou passe ene tigite le temps aussi dans ibaadat dans la nuit, bé au moins li pas gaspille li aussi dans kitchose ki pas bizin. Plitot li alle dormi avec l’intention pou faire namaz avec jamaat. D’après hadice, li pou gagne récompense ibaadat ene la nuit entier.

Dans ene hadice, Nabi ‎(Sallallaahou A'laihi Wasallam)‎ fine dire ki ena deux faveurs ki boucou dimoune faire défaite là-dans : c'est-à-dire la santé et le temps libre. La santé li ene faveur ki dimoune pena li tout le temps. Coumsa même ene dimoune li libre pou ene certaine boute le temps. Alors bizin conne servi ça deux faveurs-là avant ki nou perdi li et avant ki li vine trop tard. Ene l’époque dans nou la vie capave arrivé cote nou capave pé envie faire ibaadat mais soit nou pas pou ena la santé ou bien nou pas pou ena le temps.

Surtout nou banne jeunes bizin prend compte ça kitchose-là pli bien. Zotte ena la santé, l’énergie et le temps libre. Bizin profité avec ça. D’après hadice ene jeune ki fine passe so jeunesse dans ibaadat Allah Ta’ala, li pou gagne l’ombrage enbas trône Allah Ta’ala jour Qiyaamat.

Ki Allah Ta’ala donne nou tous le tawfeeq pou passe nou la vie dans kitchose ki Allah Ta’ala content ! Ameen.

[Extrait de Al Jamiat Vol.5 No.11]