Ene vrai musulman

"Ene vrai musulman c'est ene kikene ki banne musulmans reste en paix de so la langue et so la main…"

(Boukhari)

Ena plusieurs niveau de Imaan. Donc ena plusieurs catégories de musulmans par rapport à ça degré de imaan ki chakene possédé. Si li vrai pou dire ki ene personne ki faire so prochain du tort li continué reste ene musulman, ça aussi li vrai ki li pas ene bon mulsulman.

Ene bon musulman ou bien ene musulman dans le vrai sens du mot, c'est ene personne ki comporte li dans ene telle façon ki li vine ene source de paix pou so prochain. Li inspire l'amitié et l'affection. Tout dimoune senti à l'aise et en sécurité avec li. Ene dimoune li en sécurité quand so la vie, so l'honneur, so du bien et so la famille li en sécurité. Donc ene vrai musulman c'est ene kikene ki pas faire so prochain souffert dans aukene façon. Li pas interfère avec so la vie, so l'honneur, so du bien et so la famille.

Nabi ‎(Sallallaahou A'laihi Wasallam)‎ fine mentionne la main et la langue dans ça hadice-là parceki ene dimoune li servi ça même deux parties pli boucou pou faire so prochain du tort. Sinon pas gagne droit faire du tort avec aukene partie le corps. Si ene dimoune servi so li pied pou faire kikene du tort, ça aussi li interdit et li haraam. Et ça aussi li empêche ene dimoune vine ene vrai musulman.

En principe ene musulman li reste dans ene milieu musulman. C'est par rapport à ça contexte-là ki Nabi ‎(Sallallaahou A'laihi Wasallam)‎ fine qualifié celui ki pas faire banne musulmans du tort de ene véritable musulman. Ça à aukene moment pas signifié ki li permette faire du tort banne non musulmans parceki couma li nécessaire vive bien avec banne musulmans, coumsa même bizin pas faire banne non musulmans aussi du tort. Mais ça pas signifié aussi ki gagne droit développe intimité avec banne non musulmans.

L'Islam autorise nou établir contact avec banne non musulmans pou faire commerce. Coumsa même li recommandé pou sympathise avec zotte et aide zotte dans zotte difficulté. Couma li permette agir bien avec zotte par courtoisie et par la diplomatie avec l'unique but pou promouvoir Deen mais sans kit gain mondaine ou l'intérêt personnel.

Mais à aukene moment li pas permette pou établir relation intime avec zotte. Ça genre de relation-là même ki Allah Ta'ala dans plusieurs place dans Qour'aan-e-Kareem fine empêche nou établir avec banne non musulmans.

Ki VEUT DIRE MOUHAJIR ET HIJRAH

« … Et ene vrai mouhajir, c'est celui ki abandonne ceki Allah (Ta'ala) fine interdit. » (Boukhari)

Mouhajir c'est ene personne ki fine faire Hijrah.

Littéralement Hijrah signifié abandonner, quitter, déplacer, immigrer etc. Dans Shariah, li faire référence à ça l'événement quand banne Sahaba-e-Kiraam et Rassouloullah ‎(Sallallaahou A'laihi Wasallam)‎ ti bizin quitte zotte l'endroit natal Makkah pou alle établir à Madinah afin pou capave pratique Deen avec liberté. Donc banne Sahaba-e-Kiraam fine bizin quitte zotte madames zenfants, zotte du bien et tout ceki zotte ti possédé. Zotte ti sorti la main vide pou alle établir à Madinah avec l'unique but pou capave vive dans le plaisir Allah Ta'ala dans la liberté totale. C'était vraiment ene sacrifice énorme.

Dans ça hadice-là, Rassouloullah ‎(Sallallaahou A'laihi Wasallam)‎ fine attire nou l'attention vers le fait ki l'essentiel dans tout ça-là, c'est l'obéissance à Allah Ta'ala, non pli le déplacement ou changement de l'endroit. Le déplacement depi Makkah à Madinah, c'était la forme de Hijrah et l'obéissance à Allah Ta'ala c'est le fond. Li vrai ki la forme li très important mais ça aussi li vrai ki le fond li pli essentiel ki tout. Ene forme sans fond, li vine ene kitchose tellement insignifiant couma dire li pas existé même. C'est dans ça sens-la même ki Rassouloullah ‎(Sallallaahou A'laihi Wasallam)‎ pas fine considère ene déplacement ou changement de l'endroit sans l'obéissance à Allah Ta'ala comme Hijrah. Acoze ça ene personne dans l'Europe ki pé pratique Deen, li pli bon ki ene personne dans Madinah ki pas pé pratique Deen.

Dans ça sens-là, le véritable Mouhajir, c'est celui ki fine abandonne tout ceki Allah Ta'ala fine interdit quand même li reste loin de Madinah. Ça genre de Hijrah-là pou continué existé ziska Qiyaamat. Et dans ça sens-là, tout dimoune ki pou abstenir de ceki Allah Ta'ala fine interdit, li pou ene véritable Mouhajir et jour Qiyaamat, li pou être décoré et honoré comme ene Mouhajir.

D'après ene hadice ki trouve dans le Mousnad de Imam Ahmad, Rassouloullah ‎(Sallallaahou A'laihi Wasallam)‎ fine dire:

"Le véritable Hijrah veut dire ki ou abstenir de banne actes immoral et ou observe namaz et ou donne zakaat. Après ça, ou déjà ene Mouhajir quand même ou mort dans "Khadramah" (ene l'endroit dans l'Arabie)."

C'est-à-dire quand même ou mort dans Khadramah ki li ene l'endroit apart, malgré ça ou ene Mouhajir si ou applique banne commandements Allah Ta'ala et ou pas casse so banne l’ordre parceki l'essentiel c'est l'obéissance Allah Ta'ala.

A ene certaine l'époque alle établir dans Madinah, pratiquement parlant, ti le seul moyen pou capave pratique Deen librement sans aukene contrainte. Acoze ça dans ça l'époque-là, Hijrah ou bien alle établir dans Madinah ti faraz. Li ti necque faraz pou ene certaine but. En li même li pas ti ça nécessaire-là. Acoze ça quand Rassouloullah ‎(Sallallaahou A'laihi Wasallam)‎ fine conquérir Makkah et quand Makkah aussi fine vine sous contrôle total de l'état Islamique, Hijrah depi Makkah à Madinah aussi fine nepli reste faraz parceki couma ene dimoune ti libre pou pratique so Deen dans Madinah, li fine gagne la même liberté dans Makkah aussi.

Mais le Hijrah dans le sens abstenir de toute sorte péché, li pou reste en vigueur ziska tout le temps. Apart ça si ene dimoune pé gagne difficulté pou pratique so Deen couma bizin dans ene certaine l'endroit, alors li faraz lors li d'après so capacité pou alle etabli dans ene l'autre l'endroit dans le mesure du possible cote li capave pratique so Deen. Coumsa même ene dimoune li bizin garde so distance avec banne milieu et l’environnement ki défavorable et néfaste pou so Deen. Ça genre de Hijrah-là c'est l'essence de Hijrah ki pou applicable pou tout le temps. Et c'est ça même type de personne ki fine être qualifié de véritable Mouhajir par Rassouloullah ‎(Sallallaahou A'laihi Wasallam)‎.

Dans le hadice, Nabi ‎(Sallallaahou A'laihi Wasallam)‎ fine qualifié de véritable Mouhajir ene personne ki abstenir de faire ceki Allah Ta'ala fine interdit. Eski ça li ene façon pou dire ki li pas important pou exécute l'ordre Allah Ta'ala pou être ene véritable Mouhajir?

D'après ene hadice ki trouve dans Mousnad Ahmad et Tirmizi, Rassouloullah ‎(Sallallaahou A'laihi Wasallam)‎ fine dire :

"… Abstenir de banne actes interdit, ou pou vine pli grand عابد (celui ki reste engager dans ibaadat) parmi tous banne dimoune…".

Dans ça hadice-là aussi Nabi ‎(Sallallaahou A'laihi Wasallam)‎ fine considère l'abstention de banne actes illicite et interdit comme élément le plus essentiel ki faire ene dimoune vine ene pli bon pratiquant. Pou explique ça, banne savants de Deen dire ki l'obéissance à Allah Ta'ala li constitué de deux éléments :

1. Abstention de banne actes interdit,
2. Exécution de banne commandements.

Mais abstenir de banne actes interdit li pli difficile. Donc li pli important. Ene dimoune ki ena ça dans li, li pou exécute banne commandements Allah Ta'ala pli bien. Peut être c'est la raison pou laquelle Rassouloullah ‎(Sallallaahou A'laihi Wasallam)‎ fine mentionne ça ene seul élément-là dans le but pou attire l'attention et mette l'emphase lors so l'importance. Sinon sans exécute commandements Allah Ta'ala, ene dimoune pas capave vine ene vrai Mouhajir. Si Rassouloullah ‎(Sallallaahou A'laihi Wasallam)‎ fine contente li avec mentionne ça ene seul-là, c'est necque acoze ki ça ene seul-là li implique et nécessite ça l'autre-là aussi ou bien acoze ki ça ene seul-là li ene indication ki la personne li ena ça l'autre-là pli bien dans li.

[Extrait de Al Jamiat Vol.5 No.11]