Qiyaam dans namaz

La posture qiyaam (diboute) dans namaz li faraz (obligatoire) dans banne namaz faraz, waajib et aussi dans les deux sounnat de namaz fajar. Ene dimoune pena droit faire ça banne namaz-là assizé sans ene raison valable. Sinon so namaz pas pou compté.

Ene dimoune bizin dresse so le corps ene quantité ki si li avoye so la main pou attrape so genoux, li pas pou gagne li. Si ene dimoune li courbé ou bien li cabosse so le corps ene quantité ki so la main capave arrive ziska cote so genoux, alors so namaz pas pou compté parceki ça quantité diboute-là li pas satisfaire condition de qiyaam. Donc c’est ene namaz ki fine faire sans qiyaam.

Ene dimoune malade et qiyaam

Ene dimoune ki pas capave dibouté faire namaz acoze kit maladie ou bien acoze ki dibouté capave aggrave ene maladie ki li ena, alors li gagne droit faire namaz assizé. Qiyaam li pas obligatoire pou ça qualité dimoune-là. Coumsa même qiyaam pas obligatoire lors ene dimoune ki pas capave faire sajdah dans la façon normal. C'est-à-dire ene dimoune ki ena kit blessure ou kit plaie ki saigné si li faire sajdah, alors li gagne droit faire sajdah avec signe. Et quand li gagne droit faire sajdah avec signe, veut dire ki qiyaam aussi pas faraz lors li. Donc li capave assizé faire namaz. Et assizé même pli bon ki li dibouté. Dans ça cas-là li faire sajdah avec signe.

Ene dimoune ki posture diboute faire so blessure saigné ou bien ki faire so l’urine dégouté, bizin faire namaz assizé. Et si li capave faire sajdah dans façon normal, li bizin faire li. Dans ça cas-là li pas capave faire li avec signe.

[Extrait de Al Jamiat Vol.5 No.12]