Tasbeehaat

Tasbeeh veut dire glorifié Allah Ta’ala. Nou glorifié Allah Ta’ala par reconnaite so grandeur et par déclare li au delà de toute sorte de manquements et de faille. Par exemple la formule ‘Soub-haanallah’ signifié ‘Mo déclaré ki Allah Ta’ala li au delà de toute faille et de tout ceki indique l’imperfection. » Quand ene dimoune dire ‘Al-hamdoulillah’ ça signifié ki Allah Ta’ala tout seul mérite appréciation. Et ‘Allahou Akbar’ signifié ki Allah Ta’ala li pli grand ki tout.

Nabi ‎(Sallallaahou A'laihi Wasallam)‎ fine enseigne nou pou faire ça trois tasbeeh-là après chaque namaz. C'est-à-dire 33 fois Soub-haanallah, 33 fois Al-hamdoulillah et 34 fois Allahou Akbar. So récompense li bien énorme. Li efface banne péchés égal à la quantité l’écume ki ena dans la mer. D’après ene l’autre hadice, Allah Ta’ala plante ene zarbre dans jannat pou chaque tasbeeh ki ene dimoune faire.

Ene facilité

Comme ene facilité, nou capave garde ene tasbeeh dans nou poche. De temps en temps ça pou faire nou rappelle zikrullah. Contrairement à ceki ene ti groupe pé propagé, faire zikrullah avec tasbeeh li ene très bon pratique et li bien profitable. Pena narien dans shariat ki empêche ça. La plupart banne savants d’auparavant ti pé servi tasbeeh pou faire zikrullah. Seul zaffaire ki zotte pas ti ena tasbeeh enfilé dans difil. Par exemple Hazrat Abou Hourairah ‎(Radiyallahou anhou‎)‎ ti pé servi la grain tamme ki li ti gardé dans ene sac pou faire zikrullah. Allaamah Jalaluddeen As-Souyouti (R) fine écrire ene livre lors-là cotte li fine amène plusieurs hadices pou prouvé ki li permette. Selon Tirmizi, Hazrat Safiyyah ‎(Radiyallahou anhou‎)‎ ti ena 4000 la grain tamme ki li ti pé servi pou faire zikrullah. Mais Rasouloullah ‎(Sallallaahou A'laihi Wasallam)‎ pas fine empêche li. Selon ene hadice rapporté par Hazrat Sa’ad Bin Waqqaas ‎(Radiyallahou anhou‎)‎ ki trouve dans Nisaï, Tirmizi, Ibn Majah et Moustadrak de Al-Hakim, Rasouloullah ‎(Sallallaahou A'laihi Wasallam)‎ fine trouve ene madame servi la grain tamme ou bien ti cailloux pou faire zikrullah et li pas fine empêche li. Tout ça-là montré ki li ene pratique tout à fait permissible et approuvé.

Le fait ki tasbeeh zordi jour li en forme colliers ki fine enfilé dans difil, li pas faire aukene différence en ceki concerne so porté légal. Essaye montré kitchose permette comme interdit li ene l’ajoute dans Deen ki bien pas bon.

[Extrait de Al Jamiat Vol.5 No.13]