Ene constat !

Mo ti croire mo capave suive Deen par mo même. Mo pena pou suive personne. Mo conne impé anglais, français. Donc pena problème langage. Mo capave gagne traduction Qour’aan, hadice et lezot matière dans ça banne langue-là. Pas nécessaire suive kikene. Mais après, ki mo fine réalisé ki mo dans l’erreur. Li couma dire ene cerf volant ki fine casse la line avec so maitre pou finalement vine ene proie dans la main banne zenfants ki pou déchire-déchire li. Li impé couma "sappe dans caraille, tombe dans difeu".

Normalement ene dimoune li suive Deen d’après interprétation ene de ça 4 imaam-là même c'est-à-dire Imam Abou Hanifah (R), Imam Malik (R), Imam Shafi (R) et Imam Ahmad Bin Hambal (R). Aster ene kikene ki fine apprane quelque part, vine dire ki li pas bizin suive personne. Li bizin suive directement Qour’aan et hadice. Donc li fine quitte tout. Mais coumaniere li pou suive Qour’aan et hadice par li même ? En réalité c’est ça kikene-là ki pé guide li. Li pé suive ça kikene-là lors la base ki ça kikene-là conne Deen plis ki li. Bé ene question posé. Eski li pas pé faire même erreur ki li ti pé faire auparavant dans suive ene Imam couma ça kikene-là ti faire li comprend? C’est ene question tout à fait logique ki bizin posé dans l’esprit ça dimoune-là. Parceki si suive ene grand Imam couma Imam Abou Hanifah (R), Imam Malik (R), Imam Shafi (R) et Imam Ahmad Bin Hambal (R) li ene erreur, alors coumaniere ça pou ene grand mérite dans suive ene kikene ki couma dire li ene zélève maternel divant ça banne professionnels-là ? Pena sortir de là ki le grand public ki pé pretanne pas suive aukene Imam, pé faire le pire par suive ça banne prédicateurs-là. Et ça aussi zotte pé suive ça banne prédicateurs-là aveuglement et aveuglement. Et li pas de trop si nou dire ki ça banne prédicateurs-là, zotte pé suive aveuglement kikene apart ça 4 Imam-là. C’est voilà couma ene dimoune casse la line avec ça banne Imam-là ki pourtant zotte banne professionnels pou vine ene zouzou dans la main banne prédicateurs ki zotte couma banne zenfant maternel. Tout ceki libère li de suive ene Imam entre ça 4 Imam-là, li vine ene proie bien facile pou toute sorte tendance. C’est par là même ki prend naissance banne tendance couma pas accepté aukene livre hadice apart Boukhari et Mouslim ou bien accepté necque ceki ena dans Boukhari pou finalement rejette tout hadice et accepté seulement Qour’aan. Couma ça li donne naissance à banne perverses ki ena l’audace légalise ene crime couma l’apostasie sans aukene pincé d’amertume dans le cœur. Tout ça-là c’est calamité pas suive ene Imam.

[Extrait de Al Jamiat Vol.5 No.14]