Barakat dans reste loin avec péché

Quand ene dimoune reste loin avec péché, Allah Ta’ala donne li la volonté pou faire bonne action par dessane l’amour et le gout pou ça action-là dans so le cœur. Ene fois li gagne so gout, aster li pou difficile quitte li pareil couma li ti difficile faire li au commencement quand li ti noyé dans péché.

Couma parfois acoze ene certaine péché, Allah Ta’ala prive li de ene quantité bonne actions. Souvent nou trouve dimoune ki ti bien dans Deen, arrivé change so trajectoire ene coup ene coup et li quitte tout. Quand faire l’inventaire, ou alle conné ki li fine tombe dans vice. Li fine content kikene ki pé prend tout so le temps dans faire SMS ou bien ki fine gagne lagamme 'chat' lors internet ou bien ki fine tombe dans banne mauvaises fréquentations.

Donc péché li noirci le cœur en sorte ki li bloque chemin de bonne actions couma résistance conte péché li mette ene qualité 'Noor' (lumière) dans le cœur ki ouvert ene quantité la porte de bienfaits et de bonne actions. C’est dans ça même sens ki d’après ene hadice, dimoune pli dans ibaadat c’est ene dimoune ki pli évite péché. Et dans Qour’aan, Allah Ta’ala dire : "Et banne ki faire zeffort dans nou chemin, sans doute nou pou guide zotte vers nou banne chemins. Et certainement Allah li avec banne ki faire bon." (V69/S29)

Quand ene dimoune li faire zeffort pou reste dans l’obéissance Allah Ta’ala, en cadeau li gagne Allah Ta’ala. Donc résisté contre péché et arrête faire péché li faire ou gagne Allah Ta’ala. D’après ene hadice, celui ki fine vine pou Allah Ta’ala, Allah Ta’ala vine pou li.

[Extrait de Al Jamiat Vol.5 No.14]