L’incontestable et l’irreparable

Pena personne ki mérite adoration apart ene seul être ki nou conné par Allah Ta'ala. C'est ene vérité ki fine prêché par tous banne prophètes. Et tous banne prophètes zotte mission fine axé et concentré pou faire l'humanité en entier conne ça même vérité-là.

Ene prophète li la crème de la société et li ene personne ki surpasse tout dimoune dans tous banne mérites et vertu. Donc c'est ene vérité ki fine prêché par banne personnage excellent, hors paire et superbe de tout l'époque. Ça faire ça vérité-là ene vérité incontestable. La personne ki contesté ça vérité-là li commette le péché le pli grave ki existé ki appelle kufr et la personne li vine ene kaafir.

Ça vérité-là li capave être contesté par pas croire dans ene être suprême couma ça capave arrivé par associé lezot dans pouvoir et capacité Allah Ta'ala.

Li bon conné ki li pas nécessaire ki ene dimoune refuse accepté tout ceki ena dans Qour'aan pou li vine kaafir. Li capave vine kaafir par refuse accepté ene parti de ça aussi. Par exemple ene dimoune ki pas accepté nou Nabi ‎(Sallallaahou A'laihi Wasallam)‎ comme dernier Nabi, li vine ene kaafir. Coumsa même banne ki mette blâme lors banne Sahaba ou bien mette tache lors nou mama Hazrat Aisha  ‎(Radiyallahou anhou‎)‎, li vine ene kaafir. So banne ibaadaat ki li faire pas pou faire li vine ene musulman tanque ki li pas faire tawbah.

Ene dimoune ki mort dans contesté l'incontestable, li commette l'irréparable. C'est-à-dire ça péché-là pas capave réparé. Ene dimoune ki mort lors ene l'état pareil, li pou alle dans l'enfer pou tout le temps. Ça péché-là pena pardon. Donc pena réparation pou ça péché-là si ene dimoune fine mort lors ça sans faire tawbah.

[Extrait de Al Jamiat Vol.6 No.1]