Imaan lors aakhirat

Ena différence entre ene dimoune ki conne so destination et ene l'autre ki pas conné. Ça dimoune ki conne so destination-là li pou pointe vers so destination avec détermination et ça deuxième ki pas conné-là li pou fini so la vie dans vire-viré sans aukene l'avance. Coumsa même quand ene dimoune li conne so but et so destination dans la vie, alors li réglé so vitesse dans so trajet de la vie vers so destination. Par contre ene ki vive dans l'oisivité, pou toujours dire "pena rôle" et finalement li dépense so la vie précieux sans faire kitchose de constructif et positif.

Celui ki conscient ki so destination c'est aakhirat et so maqsoud haqeeqi (but réel) c'est Allah Ta'ala, alors li réglé so la vie en fonction de ça. Et li élimine tout kitchose ki li juge li comme ene obstacle dans so trajet. Donc li nécessaire ki ene dimoune conné ceki li été et cote li ena pou allé.

Ça dounia-là li pas ene destination. Ena encore dounia après ça dounia-là. Ça la vie lors la terre-là li pas mette fin à l'existence ene dimoune. Chaque dimoune ena pou vive ene l'autre la vie après ça la vie lors ça le monde-là. Dimoune ki fine prend ça le monde terrestre-là même comme so destination, li fine travail zisse pou ça même sans prépare li pou la vie après la mort. Donc li fine échoué. Et dimoune ki fine servi so la vie lors la terre en fonction de so la vie ki li pou vive après so la mort, fine toujours gagnant. Donc Imaan lors aakhirat li ene théorie révolutionnaire ki capave change miraculeusement la vie et tournure ene dimoune pli perverse ki capave existé. C'est ça même théorie ki transforme banne ennemi acharné d'hier en banne frères dévoué, sympathique et sincère. C'est ça même théorie ki ti transforme les plus perverses de la société en banne personnages plus pieux. Et ça théorie-là li ene théorie universelle ki pou reste valable pou tout le temps. Sans ça croyance-là li impossible pou dimoune vive couma dimoune. Li pou ene l'autre créature malgré ki li pou ena forme dimoune.

[Extrait de Al Jamiat Vol.6 No.2]