Depi cote ça mo bizin attache Ihram pou faire ene l'autre umrah?

Question

Mo fine déjà fini faire mo Umrah. Aster mo dans makkah et mo envi faire ene l'autre umrah. Depi cote ça mo bizin attache Ihram ?

Réponse :

Ena banne points ki banne haji ou banne ki pé alle faire Umra pas gagne droit dépassé sans être en état de Ihraam. Ça banne points-là appelle meeqat. Nabi ‎(Sallallaahou A'laihi Wasallam)‎ fine fixé Zulhulaifa comme meeqat pou banne habitants de Madinah. Juhfah pou banne ki reste dans Shaam. Qarn-ul-Manazil pou banne habitants de Najd et Yalamlam pou banne ki dans Yemen. Ça banne points-là li servi comme meeqat pou tous lezot dimoune ki traverse par ça banne l'endroits-là aussi. Et Nabi ‎(Sallallaahou A'laihi Wasallam)‎ fine aussi déclaré ki banne ki endans meeqaat, zotte attache Ihraam depi acote zotte été à tel points ki bannne ki dans Makkah, zotte pou attache Ihraam depi dans Makkah même.

D'après ça hadice-là li paraite ki ene dimoune dans Makkah li gagne droit attache Ihraam pou so Urnra depi dans Makkah même couma ça li permette pou hajj. Mais ça aussi li vrai ki Nabi ‎(Sallallaahou A'laihi Wasallam)‎ ti envoye Hazrat Aisha ‎(Radiyallahou anhou‎)‎ avec so frère pou attache Ihraam depi At-Tan'ime ki reconnaite comme masjid Aisha zordi jour, afin pou li remplace so Umra ki li pas ti réussi faire avan hajj. Acoze ça, banne 'Oulama dire ki ene dimoune dans Makkah li capave attache Ihraam pou so hajj depi dans Makkah mais pou Umra li bizin sorti en dehors Makkah pou attache Ihraam. En dehors Makkah veut dire ça l'espace ki trouve entre Meeqat et limites de haraam ki nou appelle Hill Sagheer. Li sufi ki ene dimoune li sorti ziska n'importe ki point ki trouve dans ça paramete-là. Mais banne 'Oulama zotte ena ene préférence pou masjid Aisha acoze ki Nabi ‎(Sallallaahou A'laihi Wasallam)‎ ti envoye Hazrat Aisha ‎(Radiyallahou anhou‎)‎ labas. Si li alle en dehors Meeqat pou attache Ihraam, ça li pou encore pli bon. Donc ou bizin alle en dehors Makkah pou attache Ihraam pou ou Umra. Et li pli pratique ki ou alle faire li depi Masjid Aisha.

[Extrait de Al Jamiat Vol.6 No.3]