Consomme banne kitchoses pure

Rapporté par Hazrat Abou Hourairah ‎(Radiyallahou anhou‎)‎ ki Rasouloullah ‎(Sallallaahou A'laihi Wasallam)‎ fine dire:

"Certainement Allah li pure et li pas accepté (narien) apart ene kitchose ki pure. Allah Ta'ala fine ordonne banne musulmans ceki li fine ordonne banne prophetes. Alors li fine dire : « O banne prophètes! Consomme depi banne kitchoses ki pure et faire bon travail. » Et li fine dire : « O banne ki ena Imaan! Consomme depi banne kitchoses pure ki nou fine accorde zotte. » Et ensuite li (Rasouloullah ‎(Sallallaahou A'laihi Wasallam)‎ fine mentionne ene dimoune ki fine contracté ene longue voyage et ki avec so cheveux chiffonné et rempli ek la poussière pé étale so deux la main vers le ciel en invoquant « O mo Rabb! O mo Rabb! » Et pourtant so mangé li haraam, so boire li haraam, so l'habillement li haraam et li fine nourri avec kitchose haraam. Bé cote so doah pou accepté. )» (Mouslim)

Explication:

Le mot pure ki fine paraite dans ça hadice-là, quand nou dire li pou Allah Ta'ala, li signifié pure et au delà de tout manquement. Donc "Certainement Allah li pure" veut dire Allah Ta'ala pena aukene défaut et li au delà de tout kitchose ki indique manquement, faiblesse et défection.

Le mot pure quand li applique pou dimoune, li signifié ene personne ki ena banne caractères noble et ki fine purifié so l'intérieur et l'extérieur de tout ceki pas bon. Dans ce sens Qour'aan dire :

« ... c'est necque de la part de banne pieux ki Allah accepté. » (V27/S5)

Et quand li applique pou banne kitchoses, alors ça signifié propre, pure et ceki halaal. Ça aussi capave signifié ki Allah Ta'ala li accepté ene sadaqah ki fine faire avec ene kitchose ki halaal.

En ceki concerne mangé-boire, ça signifié ene kitchose ki délicieux et ki halal en li même et ki le moyen ki fine gagne li aussi li halal. Par exemple du miel li ena bon gout, li halal en li même et fine gagne li par acheté li avec ene la monnaie halal ou bien fine gagne li en cadeau avec ene ki ena ça cote li.

Donc ça signifié ki Allah Ta'ala li apprécié ene dimoune ki fine nettoye so l'intérieur couma ça li capave inclure ki Allah Ta'ala pas accepté aukene sadaqah apart ene ki pas fine contamine li ou ranne li impure par consomme kitchose haraam ou bien kitchose ki fine mal gagné. Coumsa même Allah Ta'ala li accepté necque ene action ki pure et ki fine faire avec ikhlaas (sincérité). Donc Allah Ta'ala li accepté seulement tout ceki propre, pure et halal. C'est-à-dire Allah Ta'ala li pas accepté narien de la part ene ki fine ranne li impure par servi banne kitchoses haram. Li accepté necque ene action ki fine faire avec sincérité et ene sadaqah ki fine faire avec kitchose ki halaal.

Servi halal et consomme ceki pure li tellement important ki Allah Ta'ala fine adresse ça l'ordre-là même ziska banne banne ambiya (prophètes) aussi.

Ene Nabi pena simain pou li consomme ene kitchose ki pas halal. Ça c'est acoze ki Allah Ta'ala fine accorde chaque Nabi ene protection spéciale ki protège zotte de tout ceki pas bon. Malgré ça, si Allah Ta'ala fine adresse ça l'ordre-là à banne Nabi, c'est zisse pou montré gravité consomme haram et l'autre coté pou montré l'importance, bénéfice et l'avantage mange halal.

Et so gravité li évident par le fait qui Allah Ta'ala pas accepté doah ene qui so mangé boire li haram. Et pourtant, selon ene hadice ki trouve dans Tirmizi, Nabi ‎(Sallallaahou A'laihi Wasallam)‎ fine dire :

« Certainement Allah Ta'ala li hésité (pou refusé), li rempli de bonté. Li honté pou retourne dans vide avec désespoir quand ene dimoune lève so la main vers li. »

Allah Ta'ala li hésité dans le sens ki quand ene serviteur dimane li kitchose, alors il pas refuse donne li pareil couma ene dimoune parfois li hésité pou refuse donne kikene ene kitchose ki li fine dimandé.

Allah Ta'ala li tellement généreux ki li donné avant ene dimoune dimandé et dimoune ki talle so la main avec Allah Ta'ala, li pas retourne li la main vide.

De l'autre coté, nou pou remarqué ki Nabi ‎(Sallallaahou A'laihi Wasallam)‎ fine donne l'exemple ene dimoune dans ene longue voyage. Dans contexte longtemps, voyage ti bien difficile et bien dangereux. Ene voyageur ti pé bizin atane de tout. Dans ene situation pareil, li très normal ki ene dimoune li verse plis de coté Allah Ta'ala. Li relativement pli sincère. Donc par donne l'exemple ene voyageur de ene longue trajet, Nabi ‎(Sallallaahou A'laihi Wasallam)‎ fine attire nou l'attention vers la sincérité de ça personne-là. Par « cheveux chiffonné et rempli ek la poussière » fine attire nou l'attention vers so l'apparence ki bien pitoyable. « Talle la main vers lé ciel » c'est ene signe et indication de humilité. Et finalement la formule يا رب (O mo Rabb) d'apres certaine hadice, c'est Ismul-A'zam c'est-à-dire le grand nom Allah Ta'ala ki quand servi pou dimane doah, alors Allah Ta'ala accepté ça doah-là.

Bref, la personne li ena sincérité, so l'état extérieur li pitoyable, li rempli de humilité et de dévotion et li pé servi le Ismul-A'zam c'est-à-dire tous banne conditions li là pou faire ene doah accepté mais Nabi ‎(Sallallaahou A'laihi Wasallam)‎ dire ki cote so doah pou accepté. C'est-à-dire li pou ene miracle si ene dimoune pareil so doah pou accepté.

Et la raison pou so doah pas accepté c'est acoze ki ça personne-là li dans haram. C'est-à-dire so mangé boire, so l'habillement etc. tout haram. Ça montré la gravité consomme kitchose ki pas halal. C'est-à-dire ene dimoune li prive li de Allah Ta'ala so rahmah (benediction) par servi kitchose ki pas halaal.

Dans ene hadice rapporté par Hazrat Jabir ‎(Radiyallahou anhou‎)‎ dans Mousnad Ahmad, Rasouloullah ‎(Sallallaahou A'laihi Wasallam)‎ fine dire :

«... Ene la chaire ki, fine poussé avec haraam pas pou rente dans jannat. C'est difeu (l'enfer) ki pli approprié pou ça ... » (Mousnad Ahmad)

Donc servi kitchose haraam li prive ene dimoune de so bien être et li mette ti dans extrême souffrance. Pena l'avenir dans servi kitchose haraam. Li capave servi comme ene facilité pou ene tigite le temps mais so conséquences pou bien grave pou tout le temps. Li bien vrai ki banne ki dans haraam, zotte pé zoué avec difé et zotte pé ranne zotte ene dernier misérable parceki zotte doua même pas accepté.

Haraam li comprend banne nourriture ki interdit couma la chaire porc, li chien, chat, zako, le rat, banne zanimau; féroce couma lion, tigre, l'éléphant etc. et aussi la chaire banne zanimau ki halaal mais ki pas fine faire zabah d'après shariah ou banne zanimau ki fine mort sans faire zabah. Coumsa même li comprend banne kitchose ki fine mal gagné quand même li capave halaal en li même.

Mal gagné signifié banane moyens ki interdit dans shariah pou gagne ene kitchose couma coquin, tricherie, fraude, corruption, pot de vin, l'intérêt, jeu de hasard, loterie, le course, casino, prostitution et ene rente ki fine gagné par vanne la boisson alcoolique, vidéo cassette, chanté, dansé, etc.

[Extrait de Al Jamiat Vol.6 No.3]