Péché et so remède

Péché li ene impureté. Li ranne le coeur impure. C'est ene impureté ki dépasse impureté physique. Mais acoze ki nou pas senti li, nou pas trouve li grave. Mais en réalité li bien impure.

Ene fois dans ene conversation avec Nabi ‎(Sallallaahou A'laihi Wasallam)‎, Hazrat Aisha ‎(Radiyallahou anhou‎)‎ fine montré avec signe la main ki Hazrat Safiyyah ‎(Radiyallahou anhou‎)‎ li ene madame courte. Lors ça Nabi ‎(Sallallaahou A'laihi Wasallam)‎ fine faire ressortir ki ça tigite ki li fine dire-là li tellement grave ki ça li sufi pou contamine et puante de l'eau ene l'océan en entier. Ça li assez clair pou donne ene l'idée de ça du tort ki ça faire nou le coeur.

Ene dimoune ki ena ene sens de propreté pas capave permette li commette ene péché parceki faire péché li couma dire patouille dans malpropreté. Et si jamais li fine faire li, alors li pou difficile pou li continué reste là-dans. Pli vite ki li capave, li pou rode mette li dans propre.

Ena ene façon pou nettoye chaque impureté. Impureté péché li nettoyé par dimane pardon avec Allah Ta'ala. Ça même ki nou appelle faire istighfaar ou bien faire tawbah. Li bon conné ki ena banne conditions ki bizin respecté pou ene tawbah li valable. D'abord ene dimoune li bizin ena remord et regret pou ceki li fine faire. Deuxièmement li bizin fine fini arrêté avec ça quand li pé dimane pardon. Non pli li dire : « O Allah  Pardonne-moi » et en même temps li ena verre whisky dans so la main ou bien so regard li fixé lors kitchose ki pas bizin. Et troisièmement li bizin ena décision ferme pou pas refaire li dans l'avenir. Ça trois conditions-là li applique pou tous banne péchés. Mais si li ene péché ki implique droit ene dimoune, alors bizin dimane ça dimoune-là aussi excuse.

Quand ene dimoune li faire ene tawbah sincère, Allah Ta'ala lave so péché et li nettoye so le coeur. Et ça dimoune-là li vine couma dire jamais li ti ena péché. Par contre si li persisté et li pas repentir, alors li continué gagne banne taches noirs lors so le coeur ziska ki ça li rempli partout dans so le coeur. Li arrive dans ene stage cote péché vine ene kitchose normal. Li pas trouve narien de mal dans faire li. Li vine sans pudeur. Li vine allergique avec bon kitchose. Li vine couma moutouk dans malpropreté ki content reste dans impureté péché et ki pas capave vive sans malpropreté péché. Donc li pas pense pou faire tawbah. Et ça li ene étape bien bien dangereux ki ena boucou chance capave enlève Imaan même. Ki pou resté avec ene insaan quand li pena imaan? Acoze ça faire péché li ene erreur même mais pas faire tawbah et pas repentir de ça péché-là li ene pli grand erreur. Si fine arrivé faire ene erreur, faudré pas commette pli grand erreur par pas faire tawbah.

Quand ene dimoune li faire tawbah, li vine bien proche avec Allah Ta'ala. Faudré pas coupé tranché dans essaye justifié l'injustifiable. Faudré pas rissé poussé pou faire tawbah parceki pas tout dimoune ki gagne ça chance-là. C'est banne vrai l'honorable et banne ki ena la vrai dignité même ki gagne l'honneur humilié zotte divant zotte Rabb par accepté zotte tort. Par conte banne ki dans la bassesse pou reste avec zotte l'orgueil tanque ki zotte pas apprane reconnaite zotte erreur et faire le nécessaire pou dimane pardon avec zotte Créateur. Bizin bien mette dans la tète ki la noblesse li trouve dans reconnaite erreur et faire ceki nécessaire.

[Extrait de Al Jamiat Vol.6 No.3]