Faasiq

Ene faasiq c’est ene personne ki commette ene péché majeur ou bien ene ki persisté lors ene péché mineur. Ene dimoune li dénigré li même par commette péché et li ranne li indigne. Li montré ki li sans pudeur. Acoze ça ene dimoune semblable so témoignage pas acceptable. Li bien chagrinant ki ene dimoune li capave l’honorable mais pena valeur dans lizié Allah Ta’ala. Vrai l’honneur c’est ça l’honneur ki ene dimoune ena dans lizié Allah Ta’ala. C’est ene l’honneur ki resté et li dans sur. De ce fait véritable l’honorable li pas ça dimoune ki dimoune prend li lors zépaule en triomphe mais c’est ene mouttaqui ou bien ene dimoune ki sérieux dans Deen. Ene dimoune sérieux dans Deen c’est ene personne ki assume so devoir envers so Créateur et so semblable selon banne principes enseigné par Rasouloullah ‎(Sallallaahou A'laihi Wasallam)‎.

Péché c’est péché et li bien grave parceki li signifié désobéir Allah Ta’ala ki pé comblé so banne faveurs à chaque instant lors nou. De ce fait péché li ene ingratitude et l’ingratitude en tout cas li pas ene bon manière. Banne ki cause bon manière bizin mette dans zotte la tète ki zotte pas pou ena bon manière aussi longtemps ki pas arrête désobéir zotte Créateur.

[Extrait de Al Jamiat Vol.6 No.5]