Récompense ene moumine dans aakhirat

Allah Ta’ala fine réserve ene quantité récompense dans aakhirat pou ene moumine. Ça fine détaillé dans Qour’aan-e-Kareem et dans hadice. Li difficile ou bien même impossible pou conne vrai valeur de ça banne récompense-là avec nou moyen limité. Li sufi pou conné ki ene moumine pou gagne tout ceki li dimandé et tout ceki li envi. L’envi c’est ene kitchose ki personne pena capacité satisfaire li parceki banne moyens capave fini mais l’envi-là li continué resté. Ça li dans capacité Allah Ta’ala. Li tout seul ki capave satisfaire chakene so desir parceki Allah Ta’ala so trésor li ene qualité trésor ki pas diminué. C’est insaan ki pou fatigué dimandé ziska li pou nepli conné ki li pou envi et ki li pou dimandé. Mais Allah Ta’ala so trésor pas pou diminué par ene iota aussi.

Mais ene dimoune bizin ena imaan et ki li mort lors ça imaan-là pou li capave gagne ceki Allah Ta’ala fine réserve pou li comme récompense. Ene dernier étincelle de imaan aussi li ena capacité pou faire ene dimoune rente dans jannat. Ça li donne nou ene l’idée de la valeur de imaan. Acoze ça banne ‘Oulama dire ki pena aukene fortune pli valeureux ki fortune de Imaan.

Bénéfice banne fortune ki nou ena, li restreint à ça la vie terrestre-là. Mais Imaan c’est ene fortune ki li pou faire nou gagne le bien être eternel. Acoze ça si fallait nou perdi tout mais pas nou Imaan. Tout banne bon dimoune fine accepté pou subir toute sorte sacrifice pou préserve zotte Imaan. Ene moyen pli efficace pou protège Imaan c’est reste dans compagnie banne ki bien sérieux dans deen.

[Extrait de Al Jamiat Vol.6 No.5]