Part mama-papa dans l’héritage

Du bien ki ene dimoune li quitté après so la mort, c’est so madame ou bien so missié et so banne zenfants ki hérite ça. Mais d’après shariah, ça personne-là so mama papa aussi zotte ena zotte part. C’est ene kitchose ki nou fine néglige li depi bien longtemps. C’est ene zouloum ki ena ene grand compte à rendé jour qiyaamat. Par exemple ene personne fine mort et li ena so madame, zenfant et so mama papa, alors d’après nou système à maurice c’est madame et zenfants ki hérite tout et mama papa pas gagne narien. Or d’après shariah madame-là pou ena droit à seulement 1/8 et mama papa chakene pou gagne 1/6. Et le reste li vine pou banne zenfants. Ça montré ki lors la force ene l’autre la loi, nou pé prend ene quantité dimoune zotte droit. Coumaniere capave attane gagne bénédiction Allah quand nou pé faire zouloum et nou pé prive banne dimoune de zotte droit ki Allah Ta’ala fine dessane banne versets dans Qour’aan lors Nabi ‎(Sallallaahou A'laihi Wasallam)‎ pou mentionne zotte droit et zotte haqq ?

Coumsa même quand ene personne ki pena zenfant arrivé mort et li quitte so missié ou bien so madame et li ena banne frères sœurs aussi, alors banne frères sœurs-là zotte ena droit dans ceki zotte frère ou bien zotte sœur fine quitté. Mais personne pas respecté ça.

Le système adoption ki en vigueur zordi jour li ene moyen pou prive banne héritiers légitimes de zotte droit. Celui ki ti bizin gagné, pas pé gagné. Et parfois ou propre famille li dans problème et ou fine amène étranger ki pé bien logé chez ou. Si aide dimoune ki dans problème li ene très bonne action, bé bizin conné ki ou famille proche li pli mérité. D’après hadice aide ene proche li pli ena récompense ki aide ene étranger. Ou capave trouve ene situation cote ene mama papa zotte dans difficulté et zenfant adoptif pé amusé et pé diverti avec la monnaie ki zotte zenfant fine quitté.

C’est Allah Ta’ala ki fine crée le monde et c’est so la loi même ki capave garanti la justice à tout niveau dans le monde. Donc si nou conte shariah, bé nou bizin attane subir difficulté quelque part.

[Extrait de Al Jamiat Vol.6 No.6]