L’attachement mondaine

Bizin pas faire concession dans Deen acoze dounia ki pas pou existé pou tout le temps. Dounia et tout ceki ena là-dans li temporaire. Si nou donne tout ceki nou ena pou gagne dounia, alors forcé-forcé nou pou gagne ene tigite narien ditout de ceki ena lors dounia et ça aussi pou ene tigite le temps. Et nou pou bizin quitte ça tigite-là aussi ici même avant nou dessane dans nou qabar.

Eski li pas ene gaspillage galoupe derrière ene kitchose ki pas pou vine pou ou ? Ou fine déjà trouvé kikene gagne so l’ombrage ? Dounia li ene l’ombrage. Et ça aussi li ene l’ombrage ki pas stable. Zordi li dans ou poche et demain li dans poche ene l’autre. Zordi ou lors li et demain ou pou enba li. Alors bizin pense toujours ça moment ki ou pou enba li. Ça pou faire ou reste dans l’ordre pendant ki ou lors li. Narien pas capave reste dans l’ordre sans suive principe et sans ki ena discipline. Principe et discipline ki bizin suive pou reste dans l’ordre c’est la loi Allah Ta’ala et l’enseignement de nou Nabi ‎(Sallallaahou A'laihi Wasallam)‎. Ene dimoune ki pou reste pense ça moment quand li pou enba la terre dans so qabar pou trouve la nécessité vive so la vie d’après ça principe-là. Acoze ça Nabi ‎(Sallallaahou A'laihi Wasallam)‎ fine recommane nou pou visite qabrastaan ki pou faire nou rappelle nou la mort. Mais faudré pas faire li avec ene fréquence ki faire nou trop familier aussi ziska ki ça nepli faire l’effet lors nou. L’essentiel c’est nou pense la mort ki capave affaibli et réduire nou l’attachement avec la vie mondaine.

Eski madame aussi capave alle visite qabrastaan étant donné ki zotte aussi zotte bizin ceki banne missié bizin ?

Nou ena 2 l’opinion : D’après ene l’opinion, madame pas gagne droit alle qabrastaan. Ça li basé lors banne hadice rapporté par Hazrat Abou Hourairah ‎(Radiyallahou anhou‎)‎, Hazrat Hassaan Bin Thabit ‎(Radiyallahou anhou‎)‎ et Hazrat Abdullah Bin Abbaas ‎(Radiyallahou anhou‎)‎ selon lequel Allah Ta’ala maudit banne madames ki prend l’habitude faire ziyaarat qabrastaan. D’après banne ‘Oulama de ça l’opinion-là, le hadice ki autorise ou recommane la pratique de ziyaarat qabrastaan li applique uniquement pou banne zommes.

D’après deuxième l’opinion, li autorisé pou banne madames dans l’âge dans ene condition cotte pena aukene crainte de dérapage. Pratiquement parlant, ça condition-là li pas impossible mais li bien difficile. Si dans commencement tout pou marche bien mais avec le temps pou ena laisse-allé, tolérance et négligence ki pou développe en ene laxisme total. Et finalement li vine en dehors control couma ça li été dans plusieurs pays cotte banne pratiques indésirables, immorales et haraam ziska shirk et kufr pé déroulé. Allaamah Badruddeen Al-Aini (décédé en 855H) dire dans so commentaire Umdat-ul Qari lors Sahih Boukhari :

وحاصل الكلام من هذا كله ان زيارة القبور مكروهة للنساء بل حرام فى هذا الزمان ولا سيما نساء مصر لان خروجهن على وجه فيه الفساد والفتنة ... 

« Résumé de tout ça-là c’est ki ziyaarat qabrastaan li makrouh (pratique indésirable) pou banne madames ou plitot li haraam dans ça l’époque-là surtout pou banne madames dans l’Egypte parceki zotte sortie-là li dans ene façon ki ena fassaad et fitnah. » (Umdat-ul Qari)

Donc banne ki fine autorise li, zotte fine attache li avec certaine condition. Ça condition ki « pas bizin ena aukene dérapage » si pena li au commencement, pou ena li plitard couma ça prouvé par l’expérience auparavant. Acoze ça banne ‘Oulama en général zotte en faveur l’interdiction parceki li pas sage ouvert la porte avec ene risque aussi néfaste et grave.

[Extrait de Al Jamiat Vol.6 No.7]