Coupe relation

Coupe relation avec ene musulman et arrête coze avec li par rancune li pas ene pratique islamique. Nabi ‎(Sallallaahou A'laihi Wasallam)‎ fine lance banne avertissement assez sévère concernant ene dimoune ki fer ça. Selon ene hadice rapporté par Hazrat Abou Hourairah ‎(Radiyallahou anhou‎)‎, Rasouloullah ‎(Sallallaahou A'laihi Wasallam)‎ fine dire ki li pas permette pou ene musulman ki li arrête coze avec so frère pendant plis ki 3 jours parceki celui ki arrête cozé pendant plis ki 3 jours et li arrivé mort, alors li fine rente dans l’enfer.

D’après banne hadices, banne la porte jannat ouvert jour lundi et jeudi cotte Allah Ta’ala li gracié tout banne ki pas dans shirk. Mais banne ki ena rancune et l’ennemité entre zotte, zotte pas gagne ça chance-là tanque ki zotte pas rente d’accord.

En principe ene musulman bizin toujours reste bien et garde ene bon relation avec ene l’autre musulman. A moins si ene relation li néfaste et dangereux pou Deen, alors non seulement li permette coupe ene relation pareil mais li vine obligatoire. Coumsa même si ou évite ene dimoune pou évite problème acoze so banne manière, alors ça aussi li permette. Et ça coupe relation-là li pas inclure dans coupe relation ki pas permette.

Ene désagrément capave corrigé par necque commence faire salaam. Et ça li sufi pou renoué ça relation ki ti coupé-là. Dans ça façon-là ene dimoune capave exclure li de banne ki pas mérite Allah Ta’ala so grâce.

[Extrait de Al Jamiat Vol.6 No.8]