Mama/Papa

Pena personne ki capave content ou plis ki ou mama papa. Mama papa zotte colère li pli bon ki ene étranger so sourire parceki mama papa pé capave montré colère mais zotte le cœur li rempli avec l’amour. Par conte ene étranger so sourire li capave être ene poison mielleux.

Bizin toujours vive bien avec mama papa. Faudré pas dire kitchose déplacé ou déplaisant à zotte l’égard. Li ene très grand péché pou servi banne mots grossié et banne jurons. Et ça li encore pli grave à l’égard mama papa. Boucou parmi nou capave dire ki jamais li fine faire ça et jamais li pou commette li dans l’avenir. Mais malgré tout ça-là nou pou étonné pou conné ki plus ou moins nou tous nou trempé dans ça péché-là. C’est par servi banne jurons à l’égard parents lezot et en retour lezot-là aussi zotte faire pareil avec nou. Et d’après hadice, ça aussi appelle zoure ou propre mama papa et ça li inclus parmi banne اكبر الكبائر c'est-à-dire parmi banne péché majeurs pli grave. Donc celui ki content so mama papa li pou ena respect pou lezot.

[Extrait de Al Jamiat Vol.6 No.8]