Amaanah

«Quand «amaanah» pou être négligé, alors attane qiyamat. Kikene fine dimandé : coumanière ça pu être abandonné O Allah so Rasool ‎(Sallallaahou A'laihi Wasallam)‎ ?

Rasouloullah ‎(Sallallaahou A'laihi Wasallam)‎ fine repone : Quand banne zafaire important dans Deen pou être confié à banne ki pas compétent, alors attane qiyamat.» (Boukhari)

Explication :

Quand qiyaamah pou vini ? C’est parmi banne kitchose ki personne pas conné apart Allah Ta’ala. Selon ene hadice ki trouve dans tous banne livres de hadice et ki rapporté par Hazrat Abou Hourairah ‎(Radiyallahou anhoum‎)‎, Hazrat Jibeel ‎(Alaihis Salaam)‎‎ ti vine poze quelques questions dans le but pou instruire banne Sahaba-e-Kiraam. Parmi là-dans li ti pose ene question lors qiyaamah : متى الساعة (quand qiyaamah pou été). Lors ça Rasouloullah ‎(Sallallaahou A'laihi Wasallam)‎ ti repone :

ما المسؤول عنها باعلم من السائل

«La personne ki pé être interrogé li pas conne ça plis ki la personne ki pé demandé.»

Ça montré ki Nabi ‎(Sallallaahou A'laihi Wasallam)‎ aussi pas ti conné quand qiyaamah pou vini. Néanmoins Nabi ‎(Sallallaahou A'laihi Wasallam)‎ fine mentionne banne signes ki indique l’approche de qiyaamah. Ça hadice-là pé mentionne ene de banne signes ki pou apparaite avant qiyaamah. C'est-à-dire pou arrive ene l’époque quand dimoune pou nepli capave assume zotte responsabilité. C’est parceki banne responsabilités là pou être confié à banne ki pas compétent. Li pou ene l’époque cote dimoune pas pou considère critère ki bizin considéré pou donne kikene ene poste ou bien ene responsabilité. Ene dimoune li pou gagne ene travail ou ene poste ki li pas mérité zisse acoze ki li conne dimoune. C’est manque de l’honnêteté et manque de connaissance ki amène vers ene situation pareille.

Acoze ça manque de l’honnêteté-là même nou trouvé ki à la tête de banne institutions ena banne dimounes ki pas compétent. Chaque domaine ena so dimoune ki capave occupe li. Pas tout dimoune ki capave occupe tout domaine. Ki pou arrive ça l’auto et ça banne passagers ki fine assize dans ene l’auto ki ena ene fausseur (pas chauffeur) lors volant ? Ça même dégât nou pou trouvé cote pena banne compétent.

Dimoune assez intelligent pou choisir so médecin ki capave traite so maladie. Là-dans li pas guette couleur. Li pas guette race ni li guetté couma li appelé. Bhai Abdullah pas pou hésité pou alle cote Dr Rajesh ou Ah Moy ou Robert si li juge li compétent. C’est parceki so maladie pou guéri par connaissance et compétence, pas à travers kikene so couleur ou bien so nom.

Ene pays pou faire progrès quand banne institutions et départements dans ça pays-là pé fonctionné avec efficacité. Et ça li réalisé quand ena dimoune ki capave donne bon performance. Pou cela bizin guette compétence et l’honnêteté. Ene pays ki observe ça deux critères-là dans alloué banne poste et confié banne responsabilité pou toujours faire progrès malgré so ressource restreint et limité. Par contre cotte ena considération pou lezot critère au détriment de ça deux critères-là, alors pou ena toujours problèmes à tout niveau.

[Extrait de Al Jamiat Vol.6 No.8]