Ki l’avenir …

Deen c’est ça mode de vie ki Allah Ta’ala fine choisir pou insaan vive so la vie d’après ça. C’est Allah Ta’ala ki fine crée la terre et tout ceki ena lors la terre. Et c’est Allah Ta’ala ki fine crée tout ceki existé. Ena ene seul Créateur. Donc pena aukene créateur apart Allah Ta’ala ni ena kit créature ki fine crée par kikene apart Allah Ta’ala. Donc insaan bizin suive ça mode de vie ki Allah Ta’ala fine choisir pou li. Insaan pena droit vive dans ene l’autre façon apart ça façon-là.

Nou plaigne nou la misère avec dimoune quand nou zenfant pas écoute nou. Acoze ki nou fine faire boucou pou nou zenfant, alors nou croire ki nou zenfants bizin obéir nou. En réalité nou ena parfaitement raison pou croire ça. Mais nou faire ene grand erreur quand nou pas applique ça lors nou. Eski nou fine déjà pose nou la question si nou pé vive nou la vie d’après l’ordre Allah Ta’ala ki fine donne nou tout ? Combien kitchose nou pé faire depi gramatin ziska tantôt ki li pas d’après l’ordre Allah Ta’ala ! Nou alle dormi tard sans faire namaz Esha. Nou passe ene bon boute le temps divant télévision ki pas profitable apart satisfaire nou curiosité. Ene kitchose ki rempli nou le cœur avec noireté et dévide li de Noor de Imaan. Li mette ene qualité poison dans nou l’esprit ki faire nou content et satisfait avec ceki mauvais et faire nou agacé de ceki bon. Gramatin nou lève tard sans faire namaz fajar. Et tout nou activité pendant la journée li pas d’après ceki Allah Ta’ala fine choisir pou nou. Pas vive d’après l’ordre Allah Ta’ala appelle désobéir Allah Ta’ala. Alors ki l’avenir nou pé attane dans désobéissance Allah Ta’ala.

[Extrait de Al Jamiat Vol.6 No.8]