Pas fardeau mais ene cadeau

 « Li forme parti dans ban kabeera gounnah ki ene personne li zoure so mama papa. Banne Sahaba fine dire : O Allah so Rasool ‎(Sallallaahou A'laihi Wasallam)‎ eski ene dimoune li capave zoure so mama papa ? Nabi ‎(Sallallaahou A'laihi Wasallam)‎ fine repone : Oui quand ene dimoune li zoure kikene so papa, alors ça dimoune-là li zoure so papa. Coumsa même kan li zoure so mama, alors ça dimoune-là li zoure so mama. » (Boukhari)

Dans ça hadice-là nou remarque ene kitchose ki Nabi ‎(Sallallaahou A'laihi Wasallam)‎ fine qualifié zoure mama papa parmi banne grand péché. Dans certaine hadice li fine dire : من اكبر الكبائر(min akbaril kaba-ir). C'est-à-dire non seulement li ene péché majeur mais li pli grand dans banne péché majeur. C'est-à-dire zoure mama papa non seulement li ene gounnah kabirah mais li ene pli grand péché parmi ban péché majeur. Ene dimoune li agir mal avec kikene li déjà ene mauvais kitchose mais si ça même kitchose li faire li avec so proche, li pou pli grave. Et ça même kitchose si li faire li avec ene dimoune ki fine ranne li boucou service, alors li pou encore pli grave.

Ça capave donne nou ene l’idée de so gravité si nou agir dan ene façon pareil avec nou propre mama papa parceki ça quantité ki nou doit nou mama papa, nou pas doit personne. Mama papa so colère aussi li plis ki l’amitié ene étranger. Au contraire nou capave dire ki mama papa zot capave en colère avec zot zenfant mais à jamais zot pou satisfait avec l’échec et difficulté zot propre zenfant. Zot pou toujours faire en sorte ki zot zenfant sorte gagnant dans n’importe ki situation. Par contre ene camarade ki capave pé causé, rié, badiné et li montré so sincérité envers ou mais ena des fois li capave senti ene pincement dans so le cœur si ou pé arrivé. Li capave pas digère ou réussite et ou succès.

Acoze ça Allah Ta’ala fine ordonné pou pas dire ouf aussi à l’égard mama papa :

 « … Et pas dire zot ouff aussi … » (V23/S17)

C'est-à-dire pas gagne droit montré ki ou agacé aussi. Après ça, si ene dimoune li pas reconnaissant envers so mama papa, eski ou croire li capave vine pou kikene ? À tel point si ou mama papa pas musulman, là aussi ou pas gagne droit mal agir avec zot. Li vrai ki ou pas gagne droit écoute zotte dans banne kitchose concernant deen et pratique de kufr et gunah. Mais ou pou bizin aide zotte financièrement si zotte dan le besoin et ou bizin faire zot khidmat. Si ene personne fine gagne l’occasion lave li pied so mama papa, alors li capave dire ki Allah Ta’ala content li ki li fine accorde li ça bonheur-là et ça l’honneur-là. Ou capave ene ingénieur, ene docteur, ene premier ministre, ene président ou ene le roi mais ou pou toujours reste ene zenfant pou ou mama papa ki ti pé baigne ou nu quand ou ti tipti. Zot ti pé lave ou quand ou ti pé alle toilette. Nou bizin agir avec humilité et respect avec mama papa même n’importe ki nou capave été. Pas pou narien Allah Ta’ala fine dire jannat trouve enba li pied mama. Ene lot place Nabi ‎(Sallallaahou A'laihi Wasallam)‎ fine dire ki la porte de jannat c’est mama papa. Alors c’est à nou pou préserve ça la porte-là ou abandonne li.

C’est acoze tou ça-là ki banne Sahaba-e-Kiraam avec étonnement fine dimandé : « Eski li possible ki ene dimoune li zoure so mama papa? »  Pou banne Sahaba-e-Kiraam ça ti ene kitchose impensable et impossible. Pou zotte, ça ti bizin ene lot créature apart insan pou commette ene gravité pareil. Acoze ça zotte ti dimandé si eski ene dimoune li capave zoure so mama papa parceki li impossible d’après zotte pou ene dimoune li zoure so mama papa. Acoze ça zotte fine trouvé ki pas nécessaire considère li comme ene kabeerah gounnah pou dimoune arrête faire li. Nabi ‎(Sallallaahou A'laihi Wasallam)‎ fine attire zot l’attention ki fer mama papa tane zouré avec kikene, ça aussi appelle zoure mama papa. Mais zordi jour nou trouvé ki banne donnée fine changé. Dimoune nepli ena mouhabbat et respect pou zotte mama papa. Ene garçon li capave quitte la caze so parents acoze li content kit tifille. Et ene tifille aussi li capave quitte so mama papa acoze li content kit garçon. Ene dimoune li capave casse relation avec so mama papa zis pou faire plaisir so partenaire ou so banne camarade. Quand mama papa fine vine vieux, zot considère zot comme ene l’embarras et ene fardeau ki bizin débarrassé. Zordi jour l’éducation ki nou pé gagné pé européanise nou la vie à tout niveau cot si nou fine bénéficié impé, nou fine encaisse boucou ceki pas bizin aussi. C’est ça même ki pou faire nou alle kit nou mama papa dans ‘home’ et fer nou garde nou li chien dans la caze. Nou capave lave nou loto 2-3 fois par semaine et nou pou lave so la roue plein avec la boue aussi bien propre mais peut être nou capave trouve ça impé humiliant pou taille zongle nou mama papa ou soit peigne zot cheveux et garde zotte dans propreté.

Tout gounnah ena ene conséquence grave mais conséquence mal agir avec mama papa, capave trouve li dans dounia même. Zoure mama papa pas gagne droit même ça. Mais ça aussi pas gagne droit ki nou faire en sorte ki nou mama papa tane zourer acoze nou mauvais comportement. Et c’est ça même ki Nabi ‎(Sallallaahou A'laihi Wasallam)‎ fine appelle li gounah kabeerah. Dans ene lot place li fine qualifié ça de : ‘pli grave dans pli grave’. Si ou zoure kikene so mama papa, li aussi li pou zoure ou mama papa. Donc zoure kikene so mama papa li ene péché pli grave parmi banne péché pli grave ki ena parceki c’est ene moyen pou faire ou mama papa tanne zouré. Ki quantité pli grave li pu été quand ou pou zoure ou mama papa ou même directement !

Donc non seulement li boucou boucou grave pou zoure mama papa mais ça aussi li boucou grave ki ou faire kitchose ki pou faire ou mama papa tane zouré. Par ça hadice-là Nabi ‎(Sallallaahou A'laihi Wasallam)‎ fine dresse la société même en entier. Ene dimoune li pas pou rode faire ene kitchose déplacé dans la société par crainte ki so mama papa tanne zouré. Donc mama papa c’est ene grand cadeau – pas ene fardeau.

[Extrait de Al Jamiat Vol.6 No.11]