La colère

Le cœur li couma dire ene forteresse. Et shaitaan li ene l’ennemi ki oulé à tout prix pou pénétré dans ça forteresse-là. Acoze ça ene insaan bizin surveille ça banne chemin et banne la passe ki shaitaan servi pou attaque le cœur. Ene des banne moyens ki shaitaan servi pou attaque le cœur c’est la colère. Quand ene dimoune gagne colère alors shaitaan joué avec li pareil couma ene zenfant joué avec ene boule. Ene dimoune bizin contrôle so colère et li bizin pas vine ene boule dans li pied shaitaan. La colère couma li bien pas bon pou la santé spirituelle li néfaste pou la santé physique aussi. Ena différence entre gagne colère et faire colère. Gagne colère li ene zafaire automatique et involontaire. Alors ça li pas empêché parceki li pas dans contrôle ene dimoune. Ceki empêché c’est faire colère c'est-à-dire pas agir sous pression de colère. Au moment de colère li recommandé pou boire de l’eau. Si pé dibouté, alors assizé et si pé assizé, li allongé.

[Extrait de Al Jamiat Vol.6 No.11]