Hafiz

Zordi jour quand nou dire Hafiz, nou comprend par ça ene ki fine mémorise Qour’aan-e-Kareem par cœur. Mais longtemps presque tou dimoune même ti conne Qour’aan par cœur. Li pas ti ene kitchose rare. Ceki ti impé rare c’est banne ki ti conne hadice par cœur. Acoze ça le terme hafiz dans l’époque longtemps ti signifié ene personne ki conne banne hadice par cœur. Ki quantité hadice ene dimoune bizin conne par cœur pou capave appelle li ene hafiz de hadice ? D’après banne savants de hadice, ene hafiz c’est ene ki conne 100,000 hadice par cœur avec so texte et so chaine de naration.

Par exemple quand nou dire Hafiz Ibn Hajar Asqalaani, alors nou pas appelle li Hafiz acoze ki li ti Hafizul-Qour’aan mais nou appelle li par ça nom-là parceki li ti ene hafiz de hadice. D’après définition banne savants de hadice li ti conne 100,000 hadice par cœur avec so chaine de narration. Coumsa même nou ena ene l’autre savant de hadice Hafiz Badruddeen Al-Aini ki bien renommé ki ti conne 100,000 hadice par cœur avec so chaine de narration. Ça deux savants-là ti dans même l’époque.

Allaamah Hafiz Bin Hajar Asqalaani ki reconnaite comme ene grand expert et docteur en matière de hadice fine vécu de 773 hijri à 852 hijri. Li fine écrire boucou livres. So livre pli reconnu c’est so commentaire ki li fine écrire lors Sahih Boukhari. Ça commentaire-là li en plusieurs volumes et fine prend li 25 banané pou terminé et li appelle Fathul-Baari.

Quant à Allaamah Badruddeen Al-Aini, li ti ene célèbre Hafizul-hadice ki fine vécu de 762 hijri à 855 hijri. Li aussi li fine écrire boucou livres. Li fine aussi écrire ene commentaire lors Sahih Boukhari ki appelle Umdatul-Qaari. Li en 12 gros volumes ki fine prend 26 banané pou complété. Pena aukene commentaire de Boukhari aussi détaillé ki ça deux commentaire-là. Pena personne dans ça le monde-là ki capave dire ki li pas bizin ça 2 commentaire-là pou comprend Sahih Boukhari. Couma dire l’oummah ti endetté envers Imam Boukhari et ça dette-là fine acquitté par ça deux commentaire ki ça deux célèbre aalim et Hafizul hadice fine écrire.

Banne ki fine gagne l’occasion étudié banne livre ki ça deux savants-là fine écrire, zotte capave gagne ene l’idée de ça vaste connaissance ki ça deux savants de hadice ti possédé. Malgré ça vaste connaissance-là, ceki pli intéressant, frappant et merveilleux, c’est ki ça deux savants de hadice-là fine toujours reconnaite ki zotte bizin suive ene Imam. Allaamah Bin Hajar Asqalaani ti pé suive Imam Shafei (R) et Allaamah Badruddeen Aini ti pé suive Imam Abou Hanifah (R). Donc Allaamah Badruddeen ti ene ene Hanafi couma Allaamah Bin Hajar Asqalaani ti ene Shafi.

Ilm-e-Deen c’est ene Noor (lumière) ki illumine le cœur et ki amène humilité et taqwa dans ene personne. Ene vrai aalim pou toujours ene personne humble et muttaqui. Humilité et taqwa li faire ene personne reconnaite la vérité dans banne circonstance les plus défavorables. C’est ça même kitchose ki fine faire banne ‘Oulama couma Allaamah Bin Hajar et Allaamah Badruddeen reconnaite valeur banne aimmah ki ti possède connaissance de Deen à ene niveau très élevé et bien avancé. Zotte fine découvert ene dimension de connaissance apart dans ça banne aimmah-là. Malgré connaissance immense et énorme ki zotte ti possédé, zotte fine trouve li trop risquant pou navigue tout seul dans ça l’océan-là sans être accompagné par ene ki pli conné. Donc zotte fine juge li sage et nécessaire pou suive ene Imam. Zotte taqwa et zotte connaissance fine permette zotte comprend ki ena ene long parcours avant zotte capave arrive dans stage et niveau ça banne aimmah-là. Zotte fine gagne l’occasion observe l’étendu de l’océan de connaissance. Zotte fine arrivé comprend ki ceki zotte possédé comme connaissance li pas représente plis ki ene goutte de l’eau devant ça l’océan-là. Zotte fine comprend ki ena ene l’autre l’horizon après ça l’horizon ki devant zotte. Le monde pas arrête existé cote l’horizon. Donc c’est à force de connaissance ki zotte fine trouve zotte incapable et conséquemment fine juge li nécessaire pou suive ene ki pli conné en l’occurrence ene mujtahid tel que Imam Abou Hanifah (R), Imam Malik (R), Imam Shafi (R) et Imam Ahmad Bin Hambal (R). Par contre ene ki pas conné li toujours déclare conné ceki li pas conné. Paraite ki li pas conné ki li pas conné. Couma dire ene ki renfermé dans ene puit ki pas conne narien apart ceki existé tout autour de lui ki donne li l’impression ki li fine explore partout.

Donc ena ki à force de connaissance li reconnaite et li admette ki li pas conné. Et de l’autre coté ena ene catégorie ki à force de l’ignorance, déclare conné ceki li pas conné. Faudré ene dimoune engage li pendant ene bon boute le temps dans acquérir connaissance de Deen sous supervision banne professionnel dans le domaine ki capave admette sans la moindre hésitation ki li pas conné. Sinon ene drome vide li faire même tapaze plis ki bizin.

[Extrait de Al Jamiat Vol.6 No.12]