15ème nuit de Sha’baan

La 15ème nuit de Sha’baan ki nou appelle li Shabe Baraat, li ene nuit béni cotte Allah Ta’ala li dessane so bénédiction et so grâce immense. Nou ena plusieurs hadice ki fine rapporté par différent Sahaba-e-Kiraam couma Hazrat Abu Bakr ‎(Radiyallahou anhou‎)‎, Hazrat Abu Moosa Al-Ashari ‎(Radiyallahou anhou‎)‎, Hazrat Aisha ‎(Radiyallahou anhou‎)‎, Hazrat Mouaz Bin Jabal ‎(Radiyallahou anhou‎)‎, Hazrat Abdullah Bin Amr ‎(Radiyallahou anhou‎)‎, Hazrat Abou Tha’labah ‎(Radiyallahou anhou‎)‎. Ça banne hadice-là fine qualifié de authentique et valable par banne savants dans le domaine. D'après ça banne hadice-là Allah Ta’ala li gracié tous so banne serviteurs à l’exception de certaine catégorie couma banne kaafir, banne rancunier etc. Li recommandé pour faire ibaadat dans ça nuit-là. Allaamah Bin Taimiya (R) dire:-

« Quant à la nuit de mi-sha’baan, alors ena ene mérite (spécial) là-dans. Ti ena parmi banne auparavant ki ti pé faire namaz pendant ça la nuit-là. Mais seulement rassemblé dans masjid pou passe ça nuit-là li ene bid'ah. » (Fatawa Bin Taimiyyah)

Ceki recommandé pou faire dans ça la nuit-là

Dans ça la nuit-là li recommandé pou faire ibaadat couma namaz nafil, tilawat-ul-Qour’aan, zikrullah, Daroud sharif, istighfaar et doah. Chaque dimoune li faire ibaadat ene quantité ki li capave. Faudré pas li faire ene quantité ki fatigue li à tel point ki faire li manque so namaz fajr.

Ceki pas bon

Parfois dans l'envie et désir pou faire ibaadat nou arrivé pas respecté banne principes de Shariat. Nou bizin conné ki ene ibaadat li vine ibaadat quand faire li d'après so principe. A ça stade-là li bon conné ki comme  principe, namaz nafil bizin faire li tout seul. Pas avec jamaat. Donc faire namaz awwabeen ou bien namaz tahajjud ou bien namaz tasbeeh ou bien namaz nafil avec jamaat li pas ene façon sounnat. Ça banne namaz là bizin faire li individuellement. Coumsa même li pas ene façon désirable pou passe ça la nuit-là dans masjid .C'est ene kitchose ki li pli bon faire li avec la famille dans la caze. En même temps li pou ene moyen pour crée ene l'environnement de Deen et ene l'atmosphère de ibaadat dans la caze.

Ceki pli important

Ceki pli essentiel c'est faire tawbah. Nou bizin saisi ça l'occasion-là pou faire tawbah avec tous banne peché. Nou prend ene l’engagement ferme et solide avec Allah Ta’ala pou nou arrête désobéir li. Et nou dimane pardon pou tous banne péché ki nou fine faire auparavant. Surtout de banne péché couma shirk, rancune, sorcellerie, désobéir parents, casse relation avec famille, mette pantalon ki couvert cheville et l'alcool. Li vraiment malheureux et regrettant pou constaté ki d'après hadice banne dimoune ki commette ene de sa banne péché-là, zotte pas bénéficié et profité avec bénédiction ki dessane dans ça la nuit-là. Et pourtant c’est ene nuit de grâce immense ! 

Ene gaspillage

Faire illumination dans ça la nuit-là c’est ene pratique ki ti introduire par ene secte ki appelle ‘Baraamika’. Avant rentre dans Deen, zotte ti ene secte ki ti pé adore du feu. Zotte fine continué ça pratique-là après avoir embrasse l'Islam. Donc illumination li pas ene pratique islamique. Et li pena narien à faire avec Deen. C'est ene gaspillage ki defane strictement dans l'Islam. A noté ki allume la lumière plis ki nécessaire li tombe dans catégorie illumination ki interdit. Banne responsable masjid bizin faire zeffort pou arrête ça  pratique-là. Insha Allah zotte pou ena ene grand récompense à gagné.

Roza de 15ème Sha'baan

Selon ene hadice dans Ibn Majah ki rapporté par Hazrat Ali ‎(Radiyallahou anhou‎)‎, Rassouloullah ‎(Sallallaahou A'laihi Wasallam)‎ fine recommane pou passe la nuit de 15ème Sha'baan dans ibaadat et pou garde roza le lendemain. D'après ene hadice de Nissai, Rassouloullah ‎(Sallallaahou A'laihi Wasallam)‎ ti pé garde boucou roza dans le mois de Sha'baan. Et comme raison, Nabi ‎(Sallallaahou A'laihi Wasallam)‎ fine dire ki c’est ene mois cotte banne dimoune zotte action présenté devant Allah Ta’ala. D'après ene hadice rapporté par Hazrat Aisha ‎(Radiyallahou anhou‎)‎, ça la nuit dans laquelle banne action présenté dans mois de Sha'baan c'est la 15ème nuit. Donc si Nabi ‎(Sallallaahou A'laihi Wasallam)‎ ti pé garde roza dans ça mois-là acoze banne action présenté, alors 15ème jour so roza li pli mérité ki nou garde li.

Ene reproche

Nou apprécié banne frères ki fine ena courage accepté et reconnaite valeur ça la nuit-là mais ena aussi banne frère ki nou capave appelle zotte banne irresponsable et ki zotte vraiment manque connaissance de Deen mais ki pretanne conné plis ki lezot, fine toujours faire nou croire à travers zotte causeries ou bien zotte banne livrets et pamphlet ki pena narien spécial dans 15ème nuit de Sha'baan. Zotte fine toujours dire ki banne hadices concernant vertu de ça la nuit-là zotte tous faible et fabriqué. Zotte fine garde le public dans noireté et l'égarement pendant plis ki ene quart siècle. Ena boucou ki fine quitte ça dounia-là avec ça même notion ki li ene nuit normale couma tout nuit. Conséquemment zotte fine alle dans Qabar sans profité et bénéficié avec banne barakat et bienfaits de ça nuit béni-là. Ki sanla ki responsable pou tous ça dégât- là? C'est banne ki déclare zotte grand connaisseur à tel point ki zotte ena l'audace pointe le doigt à banne érudits dans Deen sans la moindre hésitation. C’est banne ki pena respect pou banne ‘Oulama. Contrairement à ceki zotte fine toujours faire comprend, la nuit de 15ème Sha'baan c'est ene nuit apart acoze ki ena ene bénédiction et rahmat apart dessane là-dans. Et ça li prouvé par plusieurs hadices ki qualifié de authentique par celui ki zotte conne li par Shaikh Al Banni. En sus de ça Allaamah Bin Taimiyah (R) aussi fine reconnaite la valeur de ça la nuit-là dans so Al-Fatawa Al-Kubra.

Ceki bizin faire

Erreur-là fine fini glissé même. Aster bizin corrige erreur-là. Mais li bon conné ki li pas ene simple erreur. Li assez grave parceki li pas ene erreur de jugement ou ene erreur technique mais ene erreur ki vine par purement négligence et par prend Deen avec légèreté. Li pas ene erreur ki ene professionnel fine faire dans applique principe ou bien acoze ene erreur dans jugement. C'est ene erreur ki li vine de la part ene ki pas fine formé pou faire ene travail ki li fine faire. Li couma dire ene ki fine conduire et fine faire accident sans ki li ena ene permis de conduire ou bien ene ki déclare li médecin sans ki li ene médecin et li opère dimoune avec so ciseau tailleur! Donc bizin faire tawbah et repentir et bizin faire dimoune conné ki li ti dans l’erreur dans ceki li fine dire ou dans ceki li fine écrire. Bizin faire banne dimoune conné dans ene façon nette et claire par publié ene mise au point. Repentir, rétracté et corrige ene erreur ki fine arrivé, c'est ene caractère noble ki ranne ene dimoune honorable. Et c'est banne ki ena la noblesse même ki pou ena courage faire li.

Ziyarat Qabrastan et 15ème nuit de Sha’baan

Dimoune li blié ki li ena pou mort. Acoze ça li amène so la vie dans l’insouciance, négligence et désobéissance. Bizin faire li rappel ça étape de la mort ki tous être vivant ena pou traversé. Ça rappel-là li servi li couma ene frein à so l’anarchisme. Acoze ça li recommandé faire ziyarat qabrastan pou faire li rappel so la mort ki d’après hadice li mette fin à tous banne désirs. Pli ene dimoune li pense so la mort, pli li capave  libère li de so passion et de so désir. D’après ceki fine mentionné dans banne livres de fiqh, meilleur jour pou faire ziyarat c’est jour jum’ah. Par ça banne livres-là, li pas paraite ki ziyarat qabrastan li associé avec la 15ème nuit de Sha’baan. C'est-à-dire li pas ene pratique ki ena kit relation avec ça la nuit-là.

Li vrai ki d’après certaine hadice, li paraite ki Nabi ‎(Sallallaahou A'laihi Wasallam)‎ ti alle qabrastan. Mais d’après l’attitude banne fouqaha li facile pou constaté ki personne parmi zotte pas fine considère ça pou encourage la pratique de ziyarat. Et ni zotte fine mentionne ziyarat de qabrastan comme ene pratique recommandée parmi banne recommandation ki zotte fine faire pou ça la nuit-là. Li ene indication de zotte part ki ziyarat li pas lié avec ça la nuit-là. Acoze ça bizin pas encourage ça pratique-là dans ça la nuit-là. Surtout quand ça pé prend ene l’ambiance de fête et promenade ki faire li perdi tout so l’esprit de ibaadat. Pas conné plitard ki tournure ki ça capave prend encore ! Par l’expérience nou capave dire ki ça pou tourne bien mal ki pou ouvert la porte pou ene série de pratique ki capave bien néfaste pou nou Deen. Au lieu ça, laisse nou concentré lors banne ibaadaat couma namaz nafil, zikrullah, tilawat-ul-Qour’aan et surtout dua, tawba et istighfaar. Kikene capave ena ene différent analyse. Donc chakene ava prend responsabilité de ceki pou arrivé par encourage ou décourage ça pratique-là.

[Extrait de Al Jamiat Vol.6 No.13]