Ene epidemie

Li dans nature humaine ki li senti ene espèce brulure dans so le cœur et ene genre bouleversement quand li trouve so prochain dans bien. Si li laisse li emporté par ça sentiment-là et li agir d’après ça, alors ça pou amène li pou détesté ça dimoune ki dans bien-là et li pou toujours souhaite so malheur. Ça sentiment-là nou conne li par la jalousie.

La jalousie li existé partout et à tout niveau. Li bien rare cote capave dire ki pena la jalousie. Li existé entre banne collègues dans travail, entre banne camarades et aussi entre banne frères sœurs. Li ene maladie ki pas épargne personne. Li bien difficile pou dire ki banne ‘Oulama pas touché par ça virus-là. C’est necque banne ki fine immunise zot par faire zotte islaah (formation) ki capave fine reste à l’abri de ça virus-là.

C’est ene maladie et bien sure li ene maladie bien grave ki débalance tout dans la société. Li faire joli paraite vilain et appréciable paraite détestable. Ene climat et atmosphère rongé par ça virus-là li ranne tout dimoune extrêmement vulnérable. Ki maladie capave pli grave ki ene maladie ki faire ene frère touye so frère ? Nou ena nou la loi ki empêche possession zarme et marche ek zarme. Et définitivement ça li garanti sécurité banne dimoune mais travail-là pas fini là même. Ceki pli important c’est bizin éradique ça maladie ki faire ou servi ça zarme-là. Chaque maladie li ena ene façon pou traite li. Ça maladie-là li traité par ene Sheikh-e-Kaamil. Li pratiquement impossible pou gagne guérison de ça maladie-là sans suive ene traitement avec ene Sheikh-e-Kaamil.

[Extrait de Al Jamiat Vol.6 No.13]