Pas ene zaffaire facile ...

Avant ou lève conte ene dimoune, ou pou toujours guette so l'entourage. Jamais ou pou ena courage ou l'audace pou dire kitchose. Si ou trouvé ki li entouré avec banne «bouncer» ou bien banne gros le bras, ou pou peur banne répliques et banne conséquences graves. Combien ena coumsa lors ça la terre-là ki préfère subir au lieu dire kitchose zisse pou pas aggrave la situation. Ene dimoune pou ena parfaitement raison, reste tranquille dans ene situation pareille malgré ki li capave en raison. Si ene dimoune en tort alors li bizin reste tranquille pli bien encore. Et si li faire so la folie, li capave arrête marché lors la terre. Et pourtant so adversaire c’est ene humain couma li ki so moyen li limité. So capacité aussi ena ene limite ki capave permette li faire boucou mais pas tout ceki li envie et ni li capave agir couma li oulé partout. Malgré tout ça-là, dimoune prend précaution et pas faire imprudence dans mal agir avec kikene.

Ki faire ou croire ki ou capave cause ceki ou envie contre Imam Abou Hanifah (R) sans la moindre inquiétude ou souci ! Couma ou capave permette ou qualifié banne Oulama célèbre couma Imam Al-Ghazali et Sheikh Mouhhayyudeen Ibn-ul-Arabi de banne égaré. Eski ou croire ki pena personne derrière zotte le dos? Eski ou croire ki zotte tout seul? Faudré pas ou gagne embêté si ou pas pé trouvé acoze Allah Ta’ala pas fine donne ou ça lizié trouvé-là. En réalité c’est banne Auliya Allah ki bénéficié ene soutien très très particulier de la part Allah Ta’ala. Ene ti zenfant li pas conne valeur l’or ou bien valeur pierre précieuse ki li tout à fait normale. Banne ki encore zenfant dans Deen aussi zotte impé coumsa même. Zotte pena ça lizié-là ki capave permette zotte reconnaite ene Waliyullah. Acoze ça zotte pas hésité pou coze banne paroles déplacé à l’égard banne ‘Oulama-e-Deen et Auliya Allah couma Imam Abou Hanifa (R), Imam Ghazali (R), Sheikh Mouhayyaddeen Ibn-ul-Arabi (R). Nou bizin conné ki c’est banne grand ‘Oulama et banne Auliya Allah. Nou bizin conné ki zotte pas tout seul. D'après ene hadice Qudsi de Sahih Boukhari, celui ki éprouve l'enemité pou ene Wali Allah alors Allah li déclare la guerre contre ça dimoune malheureux-là. Ene dimoune li ranne li vraiment malheureux quand li pas reconnaitre valeur banne Auliya Allah. Faire ene kitchose ki Allah Ta’ala déclare la guerre contre ou ! Pas ene zaffaire facile ça.

[Extrait de Al Jamiat Vol.6 No.14]