… Nou bien aimé Nabi ‎(Sallallaahou A'laihi Wasallam)‎

Si vraiment mo content Allah Ta’ala, alors ena ene seul chemin : mo bizin suive le principe de Rasouloullah  ‎(Sallallaahou A'laihi Wasallam)‎. Lerla Allah Ta’ala aussi pou content moi et li pou pardonne mo banne péchés. Ki sanla ki mo bizin content? Tout ceki mo trouvé, mo pas trouve narien ki capave soutenir moi partout, tout le temps et dans tous banne circonstance apart ene Allah Ta’ala. Parceki li existé depi tout le temps et li pou resté ziska tout le temps. Li pena aukene défaut ni kit manquement. Li pas dépanne lors personne. Sans li, narien pas capave existé. Le bonheur et le bien-être trouve dans so la main même. Et li ena capacité pou donne moi ceki mo bizin l’heure ki li envi. Narien pas capave empêche li donne moi quand li envi verse so bénédiction lors moi. Li pas bizin permission ou autorisation avec kikene quand li envi donne moi. Li ena capacité lors tout kitchose. Pena narien ki en dehors so capacité. Donc pena narien ki mérité ki mo content li apart Allah Ta’ala. Mais ena ene façon pou content Allah Ta’ala. Vrai façon pou content Allah Ta’ala li trouve dans suive Rasouloullah  ‎(Sallallaahou A'laihi Wasallam)‎. Eski mo pé suive principe Rasouloullah  ‎(Sallallaahou A'laihi Wasallam)‎ ???

Si mo content Rasouloullah  ‎(Sallallaahou A'laihi Wasallam)‎, bé ki faire mo pas pé suive so principe ? Ki faire mo pas suive so sounnat ? Ki faire mo passe rasoir lors mo figure quand Rasouloullah  ‎(Sallallaahou A'laihi Wasallam)‎ fine dire pou garde la barbe ? Ki faire mo pas laisse li poussé ziska ki li vine ene poignet ? Ki faire mo préfère garde li tipti et courte ? Mo pantalon ki faire li couvert mo cheville ? Li paraite ki mo apprécié battage lezot plis ki tareeqah Rasouloullah  ‎(Sallallaahou A'laihi Wasallam)‎.

O Allah, mo faire tawbah! Li vraiment ene erreur grave ki mo pé commette quand même mo capave présente mille et ene prétexte pou justifié moi. Pardonne moi et protège moi de ene hypocrisie pareil. Faire moi gagne mouhabbat pou Rasouloullah  ‎(Sallallaahou A'laihi Wasallam)‎ ene quantité ki permette moi admire so banne principe et so banne sounnat. O Allah, faire moi vive d’après le moubaarak tareeqah de mo bien aimé Nabi ‎(Sallallaahou A'laihi Wasallam)‎!

[Extrait de Al Jamiat Vol.6 No.15]