Quand prend ou bien tanne Nabi ‎(Sallallaahou A'laihi Wasallam)‎ so nom moubaarak

D’après principe li recommandé pou récite daroud shareef quand tanne Rasouloullah ‎(Sallallaahou A'laihi Wasallam)‎ so nom mubaarak. Si nou tanne li plusieurs fois dans ene seul place, alors li waajib pou lire daroud shareef pou la première fois et moustahab pou le reste. Mais banne ki ena l’amour et mouhabbat pou Rassouloullah ‎(Sallallaahou A'laihi Wasallam)‎, zotte pas capave même prend Rasouloullah ‎(Sallallaahou A'laihi Wasallam)‎ so nom sans dire Sallallaahou Alaihi Wasallam. Ça formule-là li bien courte mais li bon conné ki ça li représente salaat-o-salam lors Rasouloullah ‎(Sallallaahou A'laihi Wasallam)‎. Li bien vilain et agaçant pou tanne dimoune dire « Prophète fine dire … » au lieu dire Rasouloullah ‎(Sallallaahou A'laihi Wasallam)‎ et ça aussi sans dire Sallallaahou Alaihi Wasallam. C’est ene manquement ki boucou prédicateurs aussi pas réalisé quand zotte mentionne Nabi ‎(Sallallaahou A'laihi Wasallam)‎.

Quant à la pratique embrasse le doigt quand tanne Rasouloullah ‎(Sallallaahou A'laihi Wasallam)‎ so nom dans azaan, alors ça jamais ti dans la pratique de banne Sahaba-e-Kiraam et banne Tabeines. Ena banne livres ki fine rapporte hadice lors ça sujet-là mais ça banne hadice-là zotte pas authentique. Zotte banne hadice ki bien bien faible. Zotte tellement faible ki pas capave servi zotte comme ene preuve et ene base pou soutenir ça pratique-là. Allaamah Jalaaluddeen As-Souyouti (R) fine qualifié ça banne hadices-là de banne hadices fabriqués. Donc embrasse le doigt quand tanne Rasouloullah ‎(Sallallaahou A'laihi Wasallam)‎ so nom li pas sounnat ni moustahab.

Dans so livre ‘Abrul Maqaal’ Maulana Ahmad Raza Khan Barelvi fine autorise la pratique embrasse le doigt quand tanne nom moubaarak de Rasouloullah  (Sallallaahou A'laihi Wasallam)‎ dans azaan avec 4 conditions :

• Premièrement faudré pas considère ça comme ene sounnat.
• Deuxièmement faudré pas croire ki ena kit hadice authentique ki soutenir ça pratique-là.
• Troisièmement faudré pas critique banne ki pas pé faire li.
• Quatrièmement servi li comme ene traitement pou lizié (pas comme ene principe dans Deen).

La vérité li pas plis ki ça mais malheureusement la pratique « embrasse le doigt » et « pas embrasse le doigt» fine divise la communauté. Et pourtant tout d’accord ki pena narien authentique ki soutenir ça. Mais nou fine donne ça pratique-là l’importance à tel point ki ça fine vine symbole de certaine groupe. Li couma ene tempête dans ene verre de l’eau.

[Extrait de Al Jamiat Vol.6 No.15]