Récompense ene mou’mine

Mou’mine c’est ene personne ki ena Imaan. Allah Ta’ala fine réserve jannat seulement pou banne ki mort lors Imaan.

Celui ki pou rente dans jannat, li pou reste pou tout le temps là-bas. Jannat li représente le bien être eternel cotte ene dimoune pou vive dans la joie pou tout le temps. Pena narien ki appelle tristesse, la peur, regret, malheur, la misère ou difficulté dans jannat. C’est ene place ki pas manque narien. C’est ene place ki pas bizin pese bouton aussi pou gagne ceki ou oulé. Ou trouve kitchose-là divant ou dans ou disposition à peine ou gagne l’envi ça kitchose-là.

Ena kikene pli misérable ki celui ki ratte ça chance-là ? Ça chance-là li dépanne lors ene seul kitchose. Fodé ki ene dimoune li quitte ça dounia-là avec Imaan.

« C’est là-dans même ki banne ki intéressé mette pariage bizin mette pariage. » (V26/S83)

Le dernier moment de nou la vie c'est-à-dire ça moment cotte nou quitte ça dounia-là li ene moment crucial et décisif. Soit le bien être eternel ou bien la souffrance à perpétuité. Li pou le bien être eternel si fine alle avec Imaan sinon souffrance pou tout le temps.

« O Allah nou dimane Toi To Grace et nou dimane Toi protection de l’enfer. »

« O Allah faire nou tous quitte ça dounia-là avec Imaan. »

Le moyen pli efficace pou préserve Imaan c’est toujours reste dimane doua avec Allah Ta’ala pou protège nou Imaan. Après ça le moyen pli efficace c’est reste en compagnie banne personnages pieux et toujours fréquente banne milieu ki ena Deen.

[Extrait de Al Jamiat Vol.6 No.15]