… ti pé bien travail …

Li ti pé bien travail li ti pé bien guette so madame zenfant. Ene coup pas conné ki compte fine rendé. Li fine gagne fréquentation banne dimoune dans vice le course. Ala tout kitchose fine changé. Tout casse pé fini dans casino et dans le course. Loyer pas pé capave payé. Bill la lumière, dilo, téléphone tout pé tappe pile. Narien pas pé payé. Pa pé capave tire ration ni pé capave paye location. Madame so bijoux aussi fine vendé. Li fine commence prend prêté ek dimoune et li pas rendé. Dimoune pé rode li partout. Astere li pé coquin aussi acoze so vice. Finalement li fine alle dans prison. So madame fine quitte li et fine alle ek ene l’autre et banne zenfant fine abandonné. Tout ça là c’est acoze ça malpropreté ki nou conne li par jeux du hasard. Qour’aan Kareem appelle ça « Mai-sir » et qualifié li de ene impureté. Li pas ene exagération. Sans exagération c’est ene kitchose ki pé arrivé partout dans nou société. Et pli grand victime c’est banne madame zenfants. Combien la caze fine cassé. Combien dimoune fine suicidé. Combien fine vine sans l’abri. Combien zenfants zotte l’avenir fine brisé. Tout ça là acoze ça le course-là et ça banne casinos-là. Dimoune blâme l’Islam ki li pas donne banne madame liberté. Eski ou croire ki ça malpropreté-là fine donne banne madames paradis pou ki li pé encore existé et de jour en jour ça pé prend ene l’ampleur extraordinaire ? C’est banne moyen pou gagne la monnaie facile. Ene moyen bette pou distribué richesse de ene pays ki appartenir à la masse en général pou rempli poche de ene ti poignet. En tout cas li pas faire l’honneur à ene humain honorable ki digne de ça nom-là pou jouir lors cadavre so semblable.

Ene vrai insaan pas capave souhaite malheur so camarade pou enrichir li même. Li pas capave cherche so bonheur dans brise l’avenir banne zenfants innocents. Li pas capave vive dans château par ranne so semblable misérable et sans l’abri. Li pas ene insaan ça. Li ene l’autre créature avec mentalité ene l’autre créature dans forme insaan.

[Extrait de Al Jamiat Vol.7 No.1]