Longueur khutbah jum’ah

Khutbah jum’ah li bizin plitot courte ki long. À la lumière banne hadice, nou trouvé ki li pas ene taqreer ou ene causerie pou developpe banne sujets en détails. Langage aussi dans khutbah li ene langage avec ene style apart. Li pas ene langage pareil couma langage ene causerie ordinaire. D’après ene hadice ki trouve dans Abou Dawoud, Hazrat Jabir ‎(Radiyallahou anhou‎)‎ Bin Samurah ‎(Radiyallahou anhou‎)‎ dire : «Nabi ‎(Sallallaahou A'laihi Wasallam)‎ pas ti pé faire khutbah long jour jum’ah. Li ti constitué de quelque paroles seulement. » D’après ene l’autre hadice ki trouve dans Sahih Muslim et Musnad Ahmad, Hazrat Ammaar Bin Yaaçir ‎(Radiyallahou anhou‎)‎ rapporté ki mo fine tanne Rassouloullah ‎(Sallallaahou A'laihi Wasallam)‎ dire : «Ene dimoune so façon prolonge namaz et so façon raccourci khutbah li ene indication de so compréhension de Deen. Alors faire namaz vine long et faire khutbah court. »

Dans ene hadice de Abou Dawoud, Hazrat Ammaar Bin Yaaçir ‎(Radiyallahou anhou‎)‎ dire : «Rassouloullah ‎(Sallallaahou A'laihi Wasallam)‎ fine ordonne nou pou faire banne khutbah court. » par contre selon le Mou’attah de Imam Malik (R), Hazrat Abdullah Bin Mas’oud ‎(Radiyallahou anhou‎)‎ fine considère la pratique faire khutbah long et namaz court parmi banne signes ki pou apparaite dans dernier l’époque.

"... يطيلون الخطبة ويقصرون الصلاة ..."

« … zotte pou faire khutbah long et zotte pou faire namaz court… »

Ça banne hadices-là sufi pou montré ki namaz li bizin relativement pli long ki khutbah. Mais zordi jour c’est le contraire et surtout banne ‘Khutbah’ de nos jours ki pé faire en créole cote pé servi li pou développe banne thèmes en détail avec ene style dans langage ki pas approprié pou khutbah.

Ki longueur khutbah jum’ah bizin eté ?

A la lumière banne hadice de Nabi ‎(Sallallaahou A'laihi Wasallam)‎, banne ‘Oulama dire khutbah bizin pas pli long ki namaz. Li bizin pli courte ki namaz. Faire li pli long ki namaz li ene façon indésirable pou faire khutbah. Banne ‘Oulama fine estime so longueur à la longueur de ene surah de Tiwaal Moufassal. Tiwaal Moufassal c’est banne sourah ki commence apartir sourah Al-Houjouraat ziska sourah Al-Burooj. Normalement Nabi ‎(Sallallaahou A'laihi Wasallam)‎ ti pé lire banne sourah depi Tiwaal Moufassal même dans namaz jum’ah. Alors khutbah li bizin dans longueur ene de ça banne sourah-là afin ki namaz avec so banne roukou’, sajdah etc li vine pli long ki khutbah. Ene khutbah dans ça longueur-là plis plis capave faire li facilement dans 10 minutes. Ça montré ki pena aukene nécessité pou faire khutbah dans ene l’autre langue apart langue arabe. Ça khutbah-là li pas ene causerie pou élabore ene sujet en détail parceki li difficile pou faire li dans ene ti période de 10 minutes. Malgré ça si faire li dans ça ti l’espace-là alors pas pou ena so utilité. Et si faire li pli long, li pou conte sounnah. Donc ça bizin faire li en arabe même. Parceki couma fine expliqué, celui ki faire li comme ene causerie, alors li prend assez long le temps ki li pas compatible avec le mubaarak sounnah de nou Nabi ‎(Sallallaahou A'laihi Wasallam)‎. Li bien malheureux pou accomplir ene ibaadat de ene tel l’importance mélangé et patouillé avec l’impureté de bid’ah.

Si ene personne necque acoze assizé faire khutbah li qualifié de khabeeth (impure) par ene Sahabi, alors ki quantité pli impure ene personne ki faire li dans ene l’autre langage pou été ? Ki quantité impure ça dimoune ki faire so khutbah long pou été ? Tout ça-là acoze ki li ene façon ki oppose sounnat de Nabi ‎(Sallallaahou A'laihi Wasallam)‎. Quitte sounnat de Nabi ‎(Sallallaahou A'laihi Wasallam)‎ li bien grave. Faudré pas prend li avec légèreté. C’est manque de l’amour pou Rassouloullah ‎(Sallallaahou A'laihi Wasallam)‎ ki faire ene dimoune quitte sounnat de Nabi ‎(Sallallaahou A'laihi Wasallam)‎ et ça aussi sans kit regret. Néglige sounnat de Nabi ‎(Sallallaahou A'laihi Wasallam)‎ li ene symptôme de ene impureté ki trouve à l’intérieur de la personne et surtout quand zotte montré zotte fier de ça system-là.

[Extrait de Al Jamiat Vol.7 No.2]