De l’eau Zamzam

C’est ene de l’eau ki Allah Ta’ala fine faire sourcé à travers Hazrat Jibril ‎(Alaihis Salaam)‎‎ depi dans la terre pou teigne la soif de Hazrat Ismaël ‎(Alaihis Salaam)‎‎. D’après hadice meilleur la boisson c’est de l’eau et meilleur de l’eau disponible dans dounia c’est de l’eau zamzam. C’est ene de l’eau ki capave servi comme ene nourriture et capave servi comme ene moyen pou gagne shifa (guérison). D’après ene hadice de Nabi ‎(Sallallaahou A'laihi Wasallam)‎, de l’eau zamzam li servi l’objectif pou lequel fine boire li. C'est-à-dire ou capave passe ou la soif si ou soif. Ou capave servi li comme ene remède si ou malade. Donc li servi la cause pou laquel ça fine être consommé.

Plusieurs banne ‘Oulama fine boire de l’eau zamzam pou certaine but et zotte fine réussi. Imam Shaafi’ (R) ti boire ça pou archerie. Comme résultat li ti pé réussi neuf lors dix. Allaamah Al-Hakim ti boire ça pou ene bonne performance dans écrire live. Par l’ordre Allah Ta’ala, li ti le meilleur auteur et écrivain de so l’époque. Allaamah Ibn Hajar Asqalaani ti boire ça et ti dimane doua pou gagne ene mémoire impeccable similaire à Allaamah Az-Zahabi. D’après so constat Allah Ta’ala fine accomplir so désir.

D’après le Al-Moustadrak d Al-Hakim, Hazrat Abdullah Bin Abbaas ‎(Radiyallahou anhou‎)‎ ti pé lire le doua suivant quand li ti pé boire de l’eau zamzam :

اللهم انى اسئلك علما نافعا ورزقا واسعا وشفاء من كل داء

« O Allah mo dimane Toi ene connaissance bénéfique, ene nourriture au large et guérison de tous maladies. »

D’après ceki Hazrat Abdullah Bin Abbaas ‎(Radiyallahou anhou‎)‎ fine déclaré, la façon approprié pou boire de l’eau zamzam, c’est boire li en faisant face vers Qiblah et boire li en trois fois.

« Ene dimoune li pou ena même tendance ki so camarade intime ena. Alors chakene parmi ou bizin guette bien ça dimoune ki li pé faire camarade avec li. » Tirmizi

Meilleur boisson c’est de l’eau et meilleur de l’eau disponible dans dounia c’est de l’eau zamzam. Li servi comme nourriture et ene moyen de guérison.

Ou conne valeur ene kitchose quand ou perdi li. Zordi ou ena ou la santé mais ou pas conne so valeur. Dimane banne ki fine perdi li. Nou bizin conne bénéficié avec l’expérience lezot dimoune. Si nou ti conne so valeur, nou ti pou servi li cote bizin servi li.

[Extrait de Al Jamiat Vol.7 No.2]