AVEUGLE suive AVEUGLE AVEUGLEment

Ene aveugle li suive aveuglement ene l'autre aveugle dans ceki li dire. Et ça aveugle-là aussi li vine dire aveuglement ceki li fine dire. Ça même ki appelle noireté dans noireté et ça arrivé quand ene dimoune li refuse accepté banne sage et banne Fouqaha couma Imam Abou Hanifa (Rahmatoullaahi alayh), Imam Malik (Rahmatoullaahi alayh), Imam Shafi' (Rahmatoullaahi alayh) et Imam Ahmad Bin Hambal (Rahmatoullaahi alayh). Pourtant Imam Abou Hanifah (Rahmatoullaahi alayh) ti ene Tabei. C'est-à-dire li fine trouve banne Sahaba-e-Kiraam ‎(Radiyallahou anhoum‎)‎. L'époque de banne tabeine c'est parmi banne trois l'epoque ki Nabi ‎(Sallallaahou A'laihi Wasallam)‎ fine qualifié de meilleur l'époque. Mais zordi jour zotte mette tout ça-là ene coté et zotte préfère suive aveuglement banne sheikh contemporain. Zotte empêche dimoune suive Imam Abou Hanifa (Rahmatoullaahi alayh) mais zotte même zotte suive Sheikh Uthaimin. Dans zotte banne réponse ki zotte faire à banne questions, zotte contente zotte avec banne réponse ki Sheikh Uthaimin fine donné. Mais ça même kitchose zotte pas permette faire li avec Imam Abou Hanifa (Rahmatoullaahi alayh). Ça même ki appelle sappe dans caraille tombe dans difé. Zotte préfère suive aveuglement banne aveugles mais zotte lève néné pou suive ene ki trouve claire.

Ene fois trois frères fine vine faire débat concernant faire khutbah en créole. Quand fine dimane zotte ki la pratique khutbah en créole ki li été ? Li faraz, wajib, sounnat, mustahab ou bien ki li été ? Zotte pas pé conné ki pou repone. Ou faire débat lors ene sujet sans ki ou conne so position légal ! L'insouciance, l'ignorance, négligence, enfantillage ou quoi ça ? Manque de maturité même ki amène vers banne situation semblable. Après ene bon boute le temps ene frère là- dans repone ki li mustahab. L'autre frère ki ti pé agir couma capitaine dire pas capave dire mustahab. Ene ti mama le capitaine dire ki li moubaah. Les deux frères accepté li sans dimane so preuve. Ça même banne ki zotte l'arrogance empêche zotte suive banne grand 'Oulama. Mais de l'autre coté zotte pas hésité pou suive aveuglement zotte 'capitaine' aveugle ki capave être qualifié sans ene l'ombre de doute comme ene dernier ignorant divant ça banne célèbre 'Oulama ki zotte lève néné pou suive. Si ou lève néné avec de l'eau zamzam bé ki ou pé atane pou boire apart de l'eau canal.

Coumsa même zotte fine toujours faire le public comprend dans le passé pendant plis ki ene quart siècle ki 15eme nuit de Sha'baan li ene nuit ordinaire. Pena narien de spécial là-dans. Zotte fine faire causerie lors- là. Zotte fine écrire banne livrets pou réfute banne ki accepté ça nuit-là comme ene nuit bénie. Tout ça-là zotte fine faire sans conné et sans comprend. Mais banne 'Oulama ki zotte accepté aveuglement depi tout le temps, zotte même fine reconnaite ki 15eme nuit de Sha'baan li ene nuit bénie et ene nuit special. Ça fine calmé zotte ene tigite dans le sens ki zotte fine arrêté avec zotte vilain manière réfute kitchose sans connaissance et sans comprend necque par suive aveuglement.

D'après principe zotte ti bizin rétracté dans la même manière ki zotte ti réfuté. Zotte ti bizin rétracté en public dans ene façon nette et claire et avec même l'ardeur. Zotte ti bizin dire ki depi longtemps nou ti conte ça mais aster-là nou fine trouvé ki nou ti dans l'erreur et donc nou pé rétracté. Eski zotte fine faire li ? Ça bizin ena fiel pou faire ça. Malheureusement pas tout dimoune ki ena ça courage-là et ça fiel-là. D'ailleurs Allah Ta'ala pas donne ça l'honneur-là à tout qualité dimoune. C'est vraiment l'honorable même ki pu ena li ça. Mais faudré pas prend ça avec légèreté parceki ça réticence-là li ene symptôme de ene maladie bien grave. Li prend naissance apartir ça maladie grave ki appelle Kibr ou l'arrogance ki so ene atome aussi li sufi pou empêche ene dimoune rente dans jannat.

[Extrait de Al Jamiat Vol.7 No.3]