La santé

Ou conne valeur ene kitchose quand ou perdi li. Zordi nou ena la santé. Mais nou pas conne so valeur parceki nou trop ena li. Coumsa même arrivé quand nou ena ene kikchose en grande quantité ou en abondance. La jeunesse li représente le courage, l'énergie et la santé. Rarement ene jeune li conne valeur ça banne faveurs-là. Acoze ça zotte mal servi li. Capave zotte jeune âge ki pas permette zotte comprend ceki zotte ena ziska ça niveau-là. Mais ena ene kitchose ki appelle expérience. C'est ene kitchose très précieux et valeureux ki nou capave apprane li par écoute banne dimoune ki ena li. Li pas nécessaire ki nou conne ene kitchose par expérience li même. Nou capave gagne ene l'idée de ça par écoute bane ki fine passe là-dans. Acoze ça banne jeunes bizin profité avec banne ki fine fini perdi ça faveur ki appelle la santé.

Banne ki fine vine dans l'age, zotte nepli ena courage. Zotte regretté acoze zotte fine gaspille zotte courage dans l'étalage. Donc bizin écoute banne ki lors hauteur parceki zotte trouve ene ti pé pli loin ki ceki nou pencore trouvé et ki nou pou trouvé après ene bon boute le temps. Li trouve dans l'intérêt ça jeune-là ki li profité avec banne ki ena l'expérience. Succès li trouve dans marié courage de jeune avec l'expérience de banne sages et de banne ki dans l'âge. Ki sanla so cozé capave ena pli poids ki Rasouloullah ‎(Sallallaahou A'laihi Wasallam)‎ so cozé? Rasouloullah ‎(Sallallaahou A'laihi Wasallam)‎ fine recommane nou pou profité avec nou jeunesse avant la vieillesse vine zoine nou. Li fine conseille nou pou approche avec banne ki ena la sagesse.

[Extrait de Al Jamiat Vol.7 No.3]