Israaf (mal dépense)

Allah Ta’ala fine donne tout dimoune de quoi ki li capave gagne ceki li bizin pou satisfaire so banne besoins. Mais souvent problème-là li surgi quand li envi satisfaire li avec ene l’étalage et extravagance ki so moyen pas permette. Ou bien li capave faire li avec le moyen ki li disposé mais par supprime quelque part dans so budget. Débalancement-là commence apartir la même parceki bien souvent li alle faire li au détriment de banne kitchose ki important et essentielle. Nou prend ene simple l’exemple pou comprend ça. Ene dimoune li capave habille li dans ene façon convenable dans la simplicité avec ene linge ki coute meilleur marché. Mais li fine envi --- banne tissu de classe. Alors ça fine faire li dépensé impé. Donc li fine bizin faire concession dans mangé et boire zisse pou satisfaire so désir et so plaisir. Li fine bizin supprime banne kitchose essentielle aussi. Quand nou faire ça avec ene zenfant ki bizin ene bon nourriture pou so développement physique et mental, alors sans conné nou pé commette ene crime envers nou propre zenfant ki bizin ene bon nourriture pou so développent physique et mental alors sans conné nou pé commette ene crime envers nou propre zenfant. Combien ena parmi nou ki acoze zotte l’habillement zotte prend prêté. Et finalement zotte gagne difficulté pou remboursé. Banne zenfants ki paye le pot cassé parceki quand ena problème finance dans la caze, bagarre entre missié madame aussi vine ensam. Finalement zenfants ki paye tout. Voilà couma ena turbulence familiale et conjugale acoze banne extravagance dans dépense. Nou prive nou de ceki bizin derrière ceki pas bizin. Ça genre de mal dépense-là appelle israaf ki signifié dépense cote bizin ou bien cote gagne droit dépensé mais ou dépense plis ki bizin. C'est-à-dire faire extravagance dans dépense dans banne kitchose ki gagne droit dépensé. Ça li haraam ça.

Deen enseigne nou la modération dans tout kitchose. Ça li applique ziska dans ibaadat aussi. Nou bizin donne nou le temps dans ibaadat mais faudré pas faire li ene quantité ki faire nou néglige lezot responsabilité ou bien banne ibaadat pli essentiel. Si ça li interdit dans ibaadat, alors ça li donne ene l’idée de so gravité dans lezot kitchose.

Israaf li faire ene dimoune tombe dans banne kitchose indésirable et détestable pou gagne la monnaie. Li faire li perdi so dignité. Li adopté tous banne moyens pou gagne casse. Li coquin. Li embête dimoune. Li vine ene dimoune malhonnête.

Israaf li applique plitot dans banne kitchose ki permette. Mais si pé faire dépense dans banne kitchose ki pas permette, alors ça appelle Tabzeer. Et ça li pli grave ki Israaf. Tabzeer pena même so place. Li pli chagrinant ki nou dépense nou richesse ki nou fine gagné dans ene façon pou faire haraam. Nou dépense nou le temps précieux, nou l’énergie et nou richesse dans banne activités haraam pou néglige banne pratiques essentielles et obligatoire. Ça même ki appelle défaite lors défaite et haraam lors haraam. Donc nou la vie et nou l’économie pé fini dans Israaf et Tabzeer.

Ena ene lot kitchose ki appelle Taqteer ki signifié serre la main cote bizin depensé. Par exemple ene dimoune li pas hésité pou dépense dans l’éducation dounia. Mais arrive tour madrassa, alors pou li Rs 100/- ou Rs 200/- aussi trop boucou. Li trouve li trop cher. Quand ena pou dépense dans mariage, zotte bien dépensé mais tifille dimane ene mahar ene ti pé élevé, alors zotte trouve ça exorbitant. Pourtant l’essentiel dans ene mariage c’est tifille là même. Coumsa même nou hésité pou dépense pou masjid ou madrassa. C’est ene grand manquement dans nou. Tous ça-là acoze ki nou faire extravagance dans depensé. Nou dépensé plis ki bizin dépensé cote gagne droit dépensé ou bien nou pas hésité dépense cot bizin pas dépensé. So conséquence inévitable c’est ki nou pou bizin supprime cotte bizin dépensé ou bien nou pas ena même pou capave dépensé.

[Extrait de Al Jamiat Vol.7 No.4]